ភ្នំពេញ៖ សម្តេច ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិបានប្រគល់ទង់អាស៊ានជូនប្រទេសឥណ្ឌូនេស៊ីធ្វើជាម្ចាស់ផ្ទះនៃកិច្ចប្រជុំ ADMM លើកទី១៧ និង ADMM-Plus លើកទី១០នៅឆ្នាំ ២០២៣ ក្រោយពេលកិច្ចប្រជុំរដ្ឋមន្ត្រីការពារជាតិអាស៊ានបូកលើកទី៩ ត្រូវបានបិទបញ្ចប់កាលពីរសៀលថ្ងៃទី២៣ ខែវិច្ឆិកា ឆ្នាំ២០២២ នៅខេត្តសៀមរាប។

សម្តេចពិជ័យសេនា ទៀ បាញ់  បានសម្តែងនូវមោទកភាពខ្ពស់ចំពោះកិច្ចប្រជុំរដ្ឋមន្ត្រីការពារជាតិអាស៊ាន-បូកលើកទី៩ក្រោមប្រធានបទ (សាមគ្គីដើមី្បសន្តិសុខ និងភាពសុខដុម) ដែលទើបបិទបញ្ចប់ និងសម្តែងការអបអរសាទរចំពោះសម្តេចតេជោ ហ៊ុន សែន នាយករដ្ឋមន្ត្រីកម្ពុជាដែលបានលើកឡើងនូវគន្លឹះសំខាន់ៗទៅលើភាពជោគជ័យនៃកិច្ចប្រជុំរដ្ឋមន្ត្រីការពារជាតិអាស៊ាន និងកិច្ចប្រជុំពាក់ព័ន្ធមួយចំនួនត្រូវបានបង្ហាញពីការសាមគ្គីភាព និងឯកភាពយូអង្វែងរបស់អាស៊ានក្នុងការលើកកម្ពស់សន្តិភាព និងសេរី ភាពនៅក្នុងតំបន់។

ក្នុងពិធីផ្ទេរប្រគល់ទង់នោះដែរសម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិបានធ្វើកិច្ចស្វាគមន៍ចំពោះរដ្ឋមន្ត្រីក្រសួងការពារជាតិនៃប្រទេសឥណ្ឌូនេស៊ី ដែលបានឡើងកាន់តំណែងជាប្រធានអាស៊ាននៃកិច្ចប្រជុំ ADMM លើកទី១៧ និង ADMM-Plus លើកទី១០ នៅឆ្នាំ២០២៣ ព្រមទាំងមានសង្ឃឹមជឿជាក់ថា នៅក្រោមការដឹកនាំរបស់ប្រទេសឥណ្ឌូនេស៊ី និងសហប្រតិបត្តិការរបស់អាស៊ានក្នុងវិស័យការពារជាតិនឹងកាន់តែមានការរីកចម្រើនដើរឆ្ពោះទៅមុខប្រកបដោយភាពជោគជ័យ៕