ភ្នំពេញ៖ គម្រោងសិក្សាការដឹកជញ្ជូនដោយ “កន្រ្តកខ្សែកាប” ត្រូវបានមន្រ្តីជំនាញពាក់ព័ន្ធលើកយកមកពិភាក្សាគ្នាក្នុងបំណងបម្រើឱ្យវិស័យដឹកជញ្ជូនសាធារណៈនៅក្នុង តំបន់ទីក្រុង ទីប្រជុំជន និងតំបន់ទេសចរណ៍នានា។ នៅក្នុងកិច្ចពិភាក្សាកាលពីថ្ងៃទី២៣ ខែវិច្ឆិកា ឆ្នាំ២០២២ តំណាងក្រុមហ៊ុន Doppelmayr Group បានលើកឡើងពីកន្រ្តកខ្សែកាប (Cable Car) ដែលជាទំនើបកម្មលើវិស័យដឹកជញ្ចូនសាធារណៈ។

តំណាងក្រុមហ៊ុន Doppelmayr Group បានលើកឡើងទៀតថា ចំណុចសំខាន់ដែលបានលើកយកមកបង្ហាញនៅក្នុងជំនួបនេះ គឺគុណសម្បត្តិនៃការជ្រើសយកការដឹកជញ្ជូនដោយ “កន្រ្តកខ្សែកាប” (Cable Car) មកបម្រើឱ្យវិស័យដឹកជញ្ជូនសាធារណៈនៅក្នុងប្រទេសកម្ពុជា ជាពិសេសនៅភូមិសាស្ត្ររាជធានីភ្នំពេញ ដែលមាននិន្នាការ ងាកទៅរកការដឹកជញ្ជូនរួមមួយប្រកបដោយនិរន្តភាព (Sustainability) និងការគិតគូរដល់បរិស្ថាន (Environmental Friendly)។

លោក តូច ចាន់កុសល រដ្ឋលេខាធិការប្រចាំការនៃក្រសួងសាធារណការនិងដឹកជញ្ជូនបានមានប្រសាសន៍ថា រាជរដ្ឋាភិបាលកម្ពុជាកំពុងប្រឹងប្រែងគិតគូរ និងស្វែងរកដៃគូអភិវឌ្ឍន៍ដើម្បីកាត់បន្ថយការកកស្ទះចរាចរណ៍និងលើកកម្ពស់ជីវភាពរស់នៅរបស់ប្រជាពលរដ្ឋនៅក្នុងទីក្រុងនិងទីប្រជុំជនឱ្យកាន់តែប្រសើរឡើងថែមទៀត។

លោកបានលើកឡើងថា ទំនោរនៃការប្រើប្រាស់សេវាដឹកជញ្ជូនសាធារណៈរបស់ប្រជាពលរដ្ឋនៅក្នុងរាជធានីភ្នំពេញនៅមានកម្រិតនៅឡើយ ប៉ុន្តែក្រសួងនៅតែបន្តបញ្ជ្រាបការយល់ដឹងពីគុណសម្បត្តិនៃការប្រើប្រាស់សេវាដឹកជញ្ជូនសាធារណៈដោយសង្ឃឹមថា នាពេលអនាគតប្រជាពលរដ្ឋគ្រប់រូបនឹងផ្លាស់ប្តូរផ្នត់គំនិតរបស់ខ្លួនងាកមកប្រើប្រាស់សេវាដឹកជញ្ជូនសាធារណៈបានកាន់តែច្រើនឡើង។ លោក តូច ចាន់កុសល បានបញ្ជាក់ទៀតថា ក្រសួងបានធ្វើការសិក្សាលើគម្រោងអភិវឌ្ឍន៍វិស័យដឹកជញ្ជូនសាធារណៈនៅក្នុងទីក្រុងក៏ដូចជាកំពុងស្វែងរកដៃគូវិនិយោគបន្ថែមដើម្បីអភិវឌ្ឍវិស័យនេះឱ្យកាន់តែមានភាពរីកចម្រើនក្នុងនាមជាប្រទេសដែលកំពុងអភិវឌ្ឍន៍មួយក្នុងតំបន់៕