ភ្នំពេញ៖ រដ្ឋបាលគយប្រទេសចិន បានប្រកាសអំពីលក្ខខណ្ឌតម្រូវការភូតគាមអនាម័យសម្រាប់ការនាំចូលម្រេចនិងជលផលធម្មជាតិរបស់កម្ពុជាទៅកាន់ទីផ្សារប្រទេសចិន។នេះបើយោងតាមការឱ្យដឹងពីស្ថានទូតចិនប្រចាំកម្ពុជា។ ស្ថានទូតចិនប្រចាំកម្ពុជាបានឱ្យដឹងនៅព្រឹកថ្ងៃទី២៣ ខែវិច្ឆិកា ឆ្នាំ២០២២នេះថា កាលពីថ្ងៃទី២១ខែវិច្ឆិកា រដ្ឋបាលគយ ប្រទេសចិនបានចេញសេចក្តីប្រកាសស្តីអំពីលក្ខខណ្ឌតម្រូវការភូតគាមអនាម័យសម្រាប់ការនាំចូលម្រេចកម្ពុជាទៅកាន់ប្រទេសចិន។
ប្រភពដដែលនេះបានលើកឡើងថា យោងតាមច្បាប់បទប្បញ្ញត្តិពាក់ព័ន្ធក្នុងប្រទេសចិន និងបទប្បញ្ញត្តិរវាងរដ្ឋបាលគយនៃសាធារណរដ្ឋប្រជាមានិតចិននិងក្រសួងកសិកម្មរុក្ខាប្រមាញ់និងនេសាទនៃព្រះរាជាណាចក្រកម្ពុជាស្តីពីលក្ខខណ្ឌតម្រូវការភូតគាមអនាម័យសម្រាប់ការនាំចូលម្រេចកម្ពុជាទៅកាន់ប្រទេសចិនបានឱ្យដឹងថា ចាប់ពីថ្ងៃនៃប្រកាសនេះតទៅអនុញ្ញាតនាំចូលតែម្រេចកម្ពុជាដែលសមស្របនឹងលក្ខខណ្ឌតម្រូវការប៉ុណ្ណោះ។
ស្ថានទូតចិនប្រចាំកម្ពុជាបានឱ្យដឹងដែរថា នាថ្ងៃដដែលនោះរដ្ឋបាលគយប្រទេសចិនក៏បានចេញសេចក្តីប្រកាសមួយទៀតស្តីពីលក្ខខណ្ឌតម្រូវការភូតគាមអនាម័យសម្រាប់ការនាំចូលជលផលធម្មជាតិរបស់កម្ពុជាទៅកាន់ប្រទេសចិន។ សេចក្តីប្រកាសនេះបានបង្ហាញថា សម្រាប់ការនាំចូលជលផលធម្មជាតិក្នុងប្រទេសកម្ពុជាទៅកាន់ប្រទេសចិន ត្រូវអនុវត្តតាមលក្ខខណ្ឌតម្រូវការអនាម័យកំណត់ដោយពេទ្យសត្វផងដែរ៕
