ជាក់ស្តែងមានរឿងច្រើនដែលយើងគ្រប់គ្នាគួរធ្វើដើម្បីថែរក្សាសុខភាពឲ្យបានល្អដូចជាការធ្វើលំហាត់ប្រាណ ទទួលទានអាហារ និងទឹកឲ្យបានគ្រប់គ្រាន់។ ប៉ុន្តែមានមូលហេតុខ្លះបង្ហាញថាការចូលដំណេកឲ្យបានគ្រប់គ្រាន់ពុំសូវនៅខាងលើនៅក្នុងបញ្ជីនោះទេ។ យោងតាមអ្នកជំនាញគុណភាពនៃការគេងពិតជាមានអត្ថប្រយោជន៍ខ្លាំងណាស់សម្រាប់សុខភាពរាងកាយនិងផ្លូវចិត្ត។ ខាងក្រោមនេះជាហេតុផលសំខាន់ៗចំនួន៤ ដែលបញ្ជាក់ពីសារៈប្រយោជន៍នៃការគេងសម្រាប់សុខភាពផ្លូវចិត្តនិងរាងកាយរបស់អ្នក៖

១ ជួយដល់មុខងារខួរក្បាល

ពេល​យើង​គេង​លក់​ស្កប់​ស្កល់នោះ​យើង​មាន​ការ​ប្រុង​ប្រយ័ត្ន និង​មាន​ស្មារតី​កាន់​តែ​ច្បាស់លាសជាងមុន។ ចំពោះការសិក្សាការដោះស្រាយបញ្ហា និងការសម្រេចចិត្តគឺងាយស្រួលជាង។ ប៉ុន្តែ​ពេល​យើង​គេង​មិន​លក់ដំណើរការ​ខួរក្បាល​របស់​យើង​រង​ទុក្ខនិងចុះខ្សោយ។ ការគេងមិនលក់អាចបង្ខូចការវិនិច្ឆ័យរបស់យើង ដែលនាំទៅដល់គ្រោះថ្នាក់ធ្ងន់ធ្ងរ។ តាមពិតទៅការនឿយហត់គឺជាមូលហេតុមួយចម្បងនៃការបង្កឲ្យមានគ្រោះថ្នាក់ចរាចរណ៍។

២ រក្សាអារម្មណ៍បានល្អ

នៅពេលដែលយើងសម្រាកបានគ្រប់គ្រាន់យើងអាចគ្រប់គ្រងអារម្មណ៍ និងអាកប្បកិរិយារបស់យើងបានប្រសើរជាងមុន។ ឧទាហរណ៍ បើគ្មានការគេងគ្រប់គ្រាន់មនុស្សពេញវ័យអាចមានអារម្មណ៍ប្រែប្រួល ហើយកុមារអាចមានភាពច្របូកច្របល់ ឬមានបញ្ហាក្នុងការចុះសម្រុងជាមួយអ្នកដទៃ។ ការ​គេង​មិន​លក់​ក៏​មាន​ទំនាក់​ទំនង​ទៅនឹងការ​ធ្លាក់​ទឹក​ចិត្ត ការ​ធ្វើ​អត្តឃាត និង​អាកប្បកិរិយា​ប្រថុយ​ប្រថានផងដែរ។

៣ កាត់បន្ថយហានិភ័យនៃជំងឺផ្សេងៗ

អ្នក​ដែល​គេង​មិន​លក់​អាម​មាន​ហានិភ័យ​ខ្ពស់​នៃជំងឺជាច្រើនដូចជា ​ជំងឺ​បេះដូង ជំងឺ​តម្រងនោម ជំងឺលើសឈាម ជំងឺទឹកនោមផ្អែម និង​ជំងឺដាច់​សរសៃឈាម​ខួរក្បាល​។ លើសពីនេះការ​គេង​មិន​គ្រប់គ្រាន់​ក៏​ប៉ះពាល់​ដល់​ប្រព័ន្ធ​ភាពស៊ាំ​របស់​យើង​ដែរ​។ បុគ្គល​ដែល​គេង​មិន​គ្រប់គ្រាន់​អាច​មាន​ការ​លំបាក​ក្នុង​ការ​ប្រយុទ្ធ​ប្រឆាំង​នឹង​មេរោគ​ទូទៅ ដូចជា​ជំងឺ​ផ្តាសាយជាដើម។

៤ រក្សាទំងន់បានល្អ

ការ​គេង​មិន​លក់​ប៉ះពាល់​ដល់​សមត្ថភាព​រាងកាយ​របស់​យើង​ក្នុង​ការ​គ្រប់គ្រង​អ័រម៉ូន​ចំណង់​អាហារ ដូច្នេះ​អ្នក​ដែល​មាន​ទម្លាប់​គេង​មិន​គ្រប់គ្រាន់​ទំនង​ជា​មាន​ចំណង់​អាហារ​ធំ​ជាង ហើយ​បរិភោគច្រើន​ជាង​អ្នក​ដែល​គេងបានគ្រប់គ្រាន់។ ជាការពិតការសិក្សាមួយបានបង្ហាញថា មនុស្សពេញវ័យដែលគេងមិនលក់គឺមានចំនួន៥៥%ទំនងជាធាត់។ ប្រសិនបើអ្នកកំពុងព្យាយាមបញ្ចុះទម្ងន់ការសម្រាកពេលយប់គឺជារឿងសំខាន់ណាស់សម្រាប់អ្នក។

បរិមាណ​ដំណេក​ត្រឹមត្រូវ​ខុស​គ្នា​សម្រាប់​បុគ្គល​ម្នាក់ៗហើយ​វា​អាស្រ័យ​លើ​អាយុ។ 

The National Sleep Foundation បានណែនាំឲ្យគេងដូចខាងក្រោម៖ 

• ទារកទើបនឹងកើត (0-3 ខែ): 14-17 ម៉ោង។

• ទារក (4-11 ខែ): 12-15 ម៉ោង។

• ក្មេងទើបចេះដើរតេះតះ (1-2 ឆ្នាំ): 11-14 ម៉ោង។

• មត្តេយ្យសិក្សា (3-5ឆ្នាំ): 10-13 ម៉ោង។

• កុមារអាយុសិក្សា (6-13ឆ្នាំ): 9-11 ម៉ោង។

• ក្មេងជំទង់ (14-17ឆ្នាំ): 8-10 ម៉ោង។

• មនុស្សពេញវ័យជំទង់ (18-25ឆ្នាំ): 7-9 ម៉ោង។ 

• មនុស្សពេញវ័យ (26-64ឆ្នាំ): 7-9 ម៉ោង។ 

• មនុស្សចាស់ (65ឆ្នាំ+): 7-8 ម៉ោង។