ភ្នំពេញ៖ តំបន់មួយចំនួនក្នុងប្រទេសកម្ពុជា នឹងមានភ្លៀងធ្លាក់ក្នុងកម្រិតពីខ្សោយទៅមធ្យមដោយសារទទួលរងឥទ្ធិពលពីការជួបប្រសព្វគ្នានៃជ្រលងសម្ពាធទាបក្នុងកម្រិតបង្ហូរដែលរុញចូលមកពីសមុទ្រទឹកខាងត្បូង និងក្រងសម្ពាធខ្ពស់ពីភាគខាងជើង(ចិន)ក្នុងកម្រិតខ្សោយ។
យោងតាមសេចក្ដីជូនដំណឹងរបស់ក្រសួងធនធានទឹក និងឧតុនិយមបានឱ្យដឹងនៅព្រឹកថ្ងៃ១៥ ខែវិច្ឆិកា ឆ្នាំ២០២២នេះថា ឥទ្ធិពលនេះនឹងកើតឡើងចាប់ពីថ្ងៃទី១៦ដល់ថ្ងៃទី២២ ខែវិច្ឆិកា ហើយធ្វើឲ្យតំបន់ទំនាបកណ្ដាលមានសីតុណ្ហភាពអប្បបរមាពី២៣-២៥អង្សាសេ និងសីតុណ្ហភាពអតិបរមាមានពី៣៣-៣៥អង្សាសេខណៈរាជធានី ខេត្ត ស្ថិត នៅភាគខាងក្រោមនឹងអាចមានភ្លៀងក្នុងកម្រិតពីខ្សោយទៅមធ្យមក្នុងនោះក៏អាចមានផ្នែកខ្លះធ្លាក់ជាបង្ហូរលាយឡំទៅដោយផ្លូវ រន្ទះ។ ចំណែកឯបណ្តាខេត្តនៅភាគខាងលើ ក៏នឹងអាចមានភ្លៀងក្នុងកម្រិតខ្សោយទៅមធ្យមផងដែរ។
ក្រសួងបានឱ្យដឹងបន្តថា នៅតំបន់ខ្ពង់រាបសីតុណ្ហភាពអប្បបរមាមានពី២២-២៤អង្សាសេសីតុណ្ហភាពអតិបរមាមានពី៣៤-៣៦អង្សាសេ នឹងអាចមានភ្លៀងក្នុងកម្រិតពីតិចទៅមធ្យម។ ជាមួយគ្នានេះនៅតំបន់មាត់សមុទ្រសីតុណ្ហភាពអប្បបរមាមានពី២៣-២៥អង្សាសេ និងសីតុណ្ហភាពអតិបរមាមានពី៣២.៣៤អង្សាសេ នឹងអាចមានភ្លៀងក្នុងកម្រិតពីខ្សោយទៅបង្គួរដោយលាយឡំទៅដោយផ្គរ រន្ទះ៕
