ភ្នំពេញ៖ កិច្ចព្រមព្រៀងក្របខ័ណ្ឌសម្រាប់គម្រោងសាងសង់ផ្លូវល្បឿនលឿនតភ្ជាប់ពីរាជធានីភ្នំពេញឆ្ពោះទៅទីក្រុងបាវិត ខេត្តស្វាយរៀង ត្រូវបានធ្វើពិធីចុះហត្ថលេខា រវាងរាជរដ្ឋាភិបាលកម្ពុជានិងក្រុមហ៊ុនសាជីវកម្មស្ពាន និងថ្នល់ចិន(CRBC)នាថ្ងៃព្រឹកទី១០ ខែវិច្ឆិកា ឆ្នាំ២០២២។ លោកទេសរដ្ឋមន្រ្តី ស៊ុន ចាន់ថុល រដ្ឋមន្រ្តីក្រសួងសាធារណការ និងដឹកជញ្ជូនបានថ្លែងក្នុងពិធីចុះហត្ថលេខាថា គម្រោងនេះនឹងប្រើប្រាស់ថវិកាចំនួនជាង១៦០០លានដុល្លារ នឹងរំពឹងថាអាចបើកការដ្ធាននៅ២០២៣ហើយនឹងបញ្ចប់នៅកំឡុងឆ្នាំ២០២៧ខណៈគម្រោងនេះ នឹងជួយកាត់បន្ថយថ្លៃដឹកជញ្ចូនឱ្យមានតម្លៃកាន់តែប្រសើរ។

ក្រសួងសាធារណការ និងដឹកជញ្ជូនបានឱ្យដឹងថា គម្រោងផ្លូវល្បឿនលឿនភ្នំពេញ-បាវិត(Phnom Penh-Bavet Expressway)ជាខ្សែផ្លូវថ្មីទាំងស្រុងដែលមានប្រវែងសរុបប្រហែល១៣៨គីឡូម៉ែត្រហើយត្រូវសាងសង់ជា៤គន្លង និងមានតួផ្លូវមានទទឹង២៥,៥ម៉ែត្រ។ ក្រសួងសាធារណការ និងដឹកជញ្ជូនបានឱ្យដឹងដែរថា ខ្សែផ្លូវនេះនឹងចេញពីភ្នំពេញនៅចំណុចផ្លូវខ្សែក្រវ៉ាត់ក្រុងទី៣កាត់តាមខេត្តកណ្តាល ខេត្តព្រៃវែង និងខេត្តស្វាយរៀង ឆ្ពោះទៅក្រុងបាវិតព្រំដែនកម្ពុជា-វៀតណាម។

យោងតាមរបាយការណ៍សិក្សារបស់ទីភ្នាក់ងារសហប្រតិបត្តិការអន្តរជាតិជប៉ុន (JICA) ផ្លូវល្បឿនលឿននេះជាប្រភេទផ្លូវលើអាកាស (Viaduct) ប្រវែងប្រហែល១២ គីឡូម៉ែត្រមានលូប្រអប់ (Box Culvert) ប្រវែងប្រហែល២៨,៤គីឡូម៉ែត្រ និងជាប្រភេទផ្លូវលើកកម្ពស់ (Embankment) ប្រវែងប្រហែល៨៥,៨គីឡូម៉ែត្រ នឹងមានផ្លូវបំបែកប្តូរទិស (Inter-Change) ចំនួន៧កន្លែងកន្លែងឈប់សម្រាក៦កន្លែង និងច្រកទ្វារព្រំដែនថ្មីចំនួន១ផងដែរ៕