កម្ពុជាក្នុងនាមជាប្រធានអាស៊ានឆ្នាំ២០២២ នឹងធ្វើជាម្ចាស់ផ្ទះរៀបចំកិច្ចប្រជុំកំពូលអាស៊ានលើកទី៤០និងទី៤១ និងកិច្ចប្រជុំកំពូលពាក់ព័ន្ធចាប់ពីថ្ងៃទី១០ដល់១៣ ខែវិច្ឆិកា ឆ្នាំ២០២២ ខាងមុខនេះនៅរាជធានីភ្នំពេញ។ ដើម្បីផ្តល់កិត្តិយសដល់ថ្នាក់ដឹកនាំកំពូលៗនៃបណ្តាប្រទេសជាមិត្ត ដែលអញ្ជើញចូលរួមនៅក្នុងកិច្ចប្រជុំនេះហើយដើម្បីបង្ហាញពីវប្បធម៌ ប្រពៃណីដ៏ថ្លៃថ្លារបស់ខ្មែរក្រសួងវប្បធម៌ និងវិចិត្រសិល្បៈបានរើសយករបាំចំនួន២ប្រភេទ ដើម្បីសម្តែងស្វាគមន៍ការអញ្ជើញមកដល់របស់ថ្នាក់ដឹកនាំចាប់ពីថ្ងៃទី០៨ ខែវិច្ឆិកានេះទៅនៅព្រលានយន្តហោះអន្តរជាតិភ្នំពេញរបាំ២នោះគឺ របាំឆៃយ៉ាំ និងរបាំក្ងោកពោធិ៍សាត់ ដែលសម្ដែងដោយក្រុមសិល្បៈនាយកដ្ឋានសិល្បៈទស្សនីយភាព នេះបើតាមការឲ្យដឹងពីបណ្ឌិត គឹម ពីនន់ អនុរដ្ឋលេខាធិការក្រសួងវប្បធម៌។
លោកថ្លែងប្រាប់អ្នកសារព័ត៌មានថា ចាប់ពីថ្ងៃទី០៨ដល់ថ្ងៃទី១២ ខែវិច្ឆិកា នេះក្រសួងវប្បធម៌បានត្រៀមរបាំឆៃយ៉ាំនិងរបាំក្ងោកពោធិ៍សាត់ដើម្បីសម្តែងទទួលស្វាគមន៍ការអញ្ជើញមកដល់របស់ប្រធានាធិបតីប្រមុខរដ្ឋរដ្ឋាភិបាល និងគណៈប្រតិភូជាន់ខ្ពស់ទាំងអស់នៅអាកាសយានដ្ឋានអន្តរជាតិភ្នំពេញតាមពេលវេលា និងកាលបរិច្ឆេទដែលបានកំណត់។
ដោយឡែកចំពោះព្រឹត្តិការណ៍អមកិច្ចប្រជុំកំពូលអាស៊ាន គឺមានមហោស្រពវប្បធម៌អាស៊ានក្រោមប្រធានបទ “មហោស្រពវប្បធម៌អាស៊ានក្នុងស្មារតីសាមគ្គី ដើម្បីសន្តិភាព”។ ចំណែកកម្ពុជានឹងលើកយកទម្រង់សិល្បៈចម្រុះដែលមានចំណងជើងថា “មហាភារតៈ” សម្ដែងនៅថ្ងៃទី១០ទី១១ ខែវិច្ឆិកា ចាប់ពីម៉ោង៦ទៅនៅឯមហោស្រពចតុម្មុខហើយប្រទេសដែលចូលរួមផ្ទាល់មាន២គឺឥណ្ឌា និងសឹង្ហបុរី។ ប្រទេសក្រៅពីនោះចូលរួមតាមប្រព័ន្ធវីដេអូ ជាពិសេសនៅថ្ងៃទី១១ មាន ការសម្តែងពីសិល្បករឥណ្ឌាហើយអនុប្រធានាធិបតីឥណ្ឌា នឹងអញ្ជើញចូលរួមទស្សនាដោយផ្ទាល់៕
