ភ្នំពេញ៖ រាជរដ្ឋាភិបាលកម្ពុជាបានបង្ហាញក្តីអាណិតអាសូរចំពោះឧបទ្ទវហេតុសោកនាដកម្មនៅក្នុងខណ្ឌស៊ីថេន ទីក្រុងសេអ៊ូល នៃសាធារណរដ្ឋកូរ៉េកាលពីថ្ងៃទី ២៩ ខែតុលា ឆ្នាំ២០២២ ដែលបានបណ្ដាលឱ្យមានអ្នកស្លាប់ និងអ្នករងរបួសជាច្រើននាក់។

នៅក្នុងសារលិខិតរបស់សម្ដេចតេជោ ហ៊ុន សែន នាយករដ្ឋមន្រ្តីកម្ពុជា បានបង្ហាញពីការចូលរួមរំលែកទុក្ខយ៉ាងក្រៀមក្រំនិងក្តីអាណិតអាសូរយ៉ាងជ្រាលជ្រៅបំផុតជូនចំពោះលោក យូន ស៊កយល ជាប្រធានាធិបតី និងចំពោះប្រជាជននៃសាធារណរដ្ឋកូរ៉េជាពិសេសក្រុមគ្រួសារដែលបាត់បង់មនុស្សជាទីស្រលាញ់ និងបានជូនពរឱ្យអ្នកដែលរងរបួសទាំងអស់ឆាប់បានជាសះស្បើយផងដែរ។

សូមបញ្ជាក់ថា ឧបទ្ទវហេតុសោកនាដកម្មក្នុងពិធីបុណ្យ Halloween នៅក្នុងខណ្ឌស៊ីថេន ទីក្រុងសេអ៊ូល នៃសាធារណរដ្ឋកូរ៉េកាលពីថ្ងៃទី ២៩ ខែតុលា ឆ្នាំ២០២២ បានបណ្ដាលឱ្យមានអ្នកស្លាប់ជាង១៥០នាក់ និងជាច្រើននាក់ទៀតបានរងរបួស។ នៅក្នុងឧបទ្ទវហេតុនេះក៏មានជនបរទេសជាច្រើននាក់បានស្លាប់ផងដែរ ប៉ុន្តែពុំមានជនជាតិខ្មែរនោះទេ៕