ភ្នំពេញ៖ ជនបរទេសប្រហែល ២០នាក់ ដែលបាត់បង់ជីវិតនៅក្នុងឧបទ្ទវហេតុរត់ជាន់គ្នានៅសង្កាត់អ៊ីថេវ៉ុន (Itaewon) នាទីក្រុងសេអ៊ូល ប្រទេសកូរ៉េ កាលពីយប់ថ្ងៃទី ២៩ ខែតុលា ឆ្នាំ២០២២ ពុំទាន់មានជនជាតិខ្មែរឡើយទេ។នេះបើតាមការឱ្យដឹងពីអ្នកនាំពាក្យ ក្រសួងការងារនិងបណ្ដុះបណ្ដាលវិជ្ជាជីវៈ។

លោក ហេង សួរ អ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈបានឱ្យដឹងនៅថ្ងៃទី៣០ ខែតុលា ឆ្នាំ២០២២នេះថានៅក្នុងឧបទ្ទវហេតុរត់ជាន់គ្នានៅសង្កាត់អ៊ីថេវ៉ុនក្នុងទីក្រុងសេអ៊ូល បណ្ដាលឱ្យជនបរទេសប្រហែល ២០នាក់ បាត់បង់ជីវិតប៉ុន្តែមិនមានជនជាតិខ្មែរឡើយ នេះបើគិតត្រឹមម៉ោង ១២ថ្ងៃត្រង់ ម៉ោងនៅប្រទេសកូរ៉េ។

យ៉ាងណាក៏ដោយអ្នកនាំពាក្យបានបញ្ជាក់ថា ស្ថានឯកអគ្គរាជទូតកម្ពុជារួមទាំងអនុព័ន្ធការងារអមស្ថានឯកអគ្គរាជទូតប្រចាំប្រទេសកូរ៉េ កំពុងបន្តទំនាក់ទំនងជាមួយអាជ្ញាធរមានសមត្ថកិច្ចកូរ៉េ និងសហគមន៍ខ្មែរនៅជុំវិញទីក្រុងសេអ៊ូល ជាប្រចាំដើម្បីតាមដានព័ត៌មានពាក់ព័ន្ធនឹងជនជាតិខ្មែរ។

តាមរបាយការណ៍បឋមបានឱ្យដឹងថា យ៉ាងហោចណាស់មានមនុស្សប្រមាណ១៥០នាក់ បានស្លាប់ខណៈជាច្រើននាក់ទៀតបានរងរបួសនៅក្នុងពិធីបុណ្យ Halloween នៅសង្កាត់អ៊ីថេវ៉ុន (Itaewon) នាទីក្រុងសេអ៊ូល ប្រទេសកូរ៉េកាលពីយប់ថ្ងៃទី ២៩ ខែតុលា ឆ្នាំ២០២២៕