ភ្នំពេញ៖ ផូស៊ីលឆ្អឹងសត្វដាយណូស័រដ៏កម្រត្រូវបានរកឃើញនៅកោះប៉ោស្ថិតក្នុងឃុំបាក់ខ្លង ស្រុកមណ្ឌលសីម៉ា ខេត្តកោះកុង ខណៈមន្រ្តីជំនាញនៃក្រសួងបរិស្ថានកំពុងធ្វើការសិក្សាស្រាវជ្រាវបន្ថែម។
លោក សាយ សំអាល់ រដ្ឋមន្រ្តីក្រសួងបរិស្ថានបានឱ្យដឹងនៅព្រឹកថ្ងៃទី២៧ ខែតុលា ឆ្នាំ២០២២ នេះថា ឆ្អឹងដែលបានរកឃើញនេះគឺជាឆ្អឹងសត្វដាយណូស័រដំបូងនៅស្រុកខ្មែរ។ លោក ហ៊ុន ម៉ារ៉ាឌី ប្រធានមន្ទីរបរិស្ថានខេត្តកោះកុងបានថ្លែងប្រាប់អ្នកសារព័ត៌មានថា ផូស៊ីលឆ្អឹងសត្វដែលត្រូវបានរកឃើញត្រូវបានសន្និដ្ឋានថា ជាឆ្អឹងសត្វដាយណូស័រ។
លោកបានបញ្ជាក់ថា ឆ្អឹងនេះត្រូវបានរកឃើញប្រមាណមួយឆ្នាំមកហើយ ហើយក្រុមការងារស្រាវជ្រាវនៃក្រសួងបរិស្ថានបានចុះមកសិក្សាស្រាវជ្រាវពាក់ព័ន្ធនឹងផូស៊ីលឆ្អឹងសត្វនេះផងដែរ ដែលវាមានទំហំប្រហាក់ប្រហែលឆ្អឹងស្មងជើងសត្វដំរី។ លោក ហ៊ុន ម៉ារ៉ាឌី ប្រធានមន្ទីរបរិស្ថានខេត្តកោះកុងបានលើកឡើងដែរថា មិនទាន់មានគោលការណ៍ពីក្រសួងថា នឹងបន្តរក្សាឆ្អឹងនេះនៅទីតាំងដើម ឬយកទៅរក្សាទុកនៅសារមន្ទីរ ឬនៅក្រសួងបរិស្ថាននៅឡើយទេ៕
