ភ្នំពេញ៖ កម្រិតទឹកភ្លៀង នឹងចាប់ផ្ដើមធ្លាក់ពីតិចទៅមធ្យមតែលាយឡំទៅដោយផ្គរ រន្ទះ ខណៈខ្យល់ក៏បានប្តូរទិសជាបណ្តើរៗចាប់ពីថ្ងៃទី២៦ ខែតុលា ដល់ថ្ងៃ១ ខែវិច្ឆិកា ឆ្នាំ២០២២។ នេះបើយោងតាមសេចក្ដីប្រកាសរបស់ក្រសួងធនធានទឹក និងឧតុនិយម។ យោងតាមសេចក្ដីប្រកាសបានឱ្យដឹងនៅព្រឹកថ្ងៃទី២៥ ខែតុលានេះថា ទ្រនុងសម្ពាធខ្ពស់ពីភាគខាងជើង (ប្រទេសចិន) បានលាតសន្ធឹងចុះមកក្រោមលើប្រទេសកម្ពុជា (ប្រសព្វនិងសម្ពាធទាបពីសមុទ្រចិនខាងត្បូង) ទន្ទឹមនោះខ្យល់ក៏បានប្តូរទិសជាបណ្តើរៗ។
ក្រសួងឱ្យដឹងបន្តថា លក្ខណៈបែបនេះនឹងធ្វើឲ្យតំបន់ទំនាបកណ្ដាល មានសីតុណ្ហភាពអប្បបរមាពី២២-២៤ អង្សារសេ និងសីតុណ្ហភាពអតិបរមាមានពី២៩-៣១អង្សារសេ ហើយបណ្តាខេត្តរាជធានី ផ្នែកខាងក្រោមនឹងអាចមានភ្លៀងក្នុងកម្រិតពីតិចទៅមធ្យមក្នុងនោះផ្នែកខ្លះ អាចមានភ្លៀងធ្លាក់បង្គួរដោយអន្លើរលាយឡំទៅដោយផ្គរ រន្ទះ ។
សេចក្ដីប្រកាសបានឱ្យដឹងបន្តថា តំបន់ខ្ពង់រាប មានសីតុណ្ហភាពអប្បបរមាពី២១-២៣អង្សារសេ និងសីតុណ្ហភាពអតិបរមាមានពី២៩-៣១អង្សារសេ នឹងអាចមានភ្លៀងក្នុងកម្រិតពីខ្សោយទៅមធ្យម លាយឡំទៅដោយផ្គរ រន្ទះ ។ ជាមួយគ្នានេះនៅតំបន់មាត់សមុទ្រមានសីតុណ្ហភាពអប្បបរមាពី២២-២៤អង្សារសេ និងសីតុណ្ហភាពអតិបរមាមានពី ២៩-៣១អង្សារសេ នឹងអាចមានភ្លៀងក្នុងកម្រិតពីខ្សោយទៅមធ្យម លាយឡំទៅដោយផ្គរ រន្ទះ ផងដែរ៕
