ពោធិ៍សាត់៖ សម្តេចតេជោ ហ៊ុន សែន នាយករដ្ឋមន្ត្រីកម្ពុជាបានអំពាវនាវដល់សាធារណជនឱ្យក្រោកឈរប្រឆាំងជនក្បត់ជាតិ។ ការអំពាវនាវនេះបានកើតឡើងបន្ទាប់ពីលោក សម រង្ស៊ី បានប្រមាថព្រះមហាក្សត្រខ្មែរ។ នៅក្នុងពិធីចែកពូជស្រូវជូនកសិករនៅខេត្តពោធិ៍សាត់នាព្រឹកថ្ងៃទី២៥ ខែតុលា ឆ្នាំ២០២២នេះសម្តេចតេជោ ហ៊ុន សែន នាយករដ្ឋមន្ត្រីកម្ពុជាបានថ្លែងថា ប៉ុន្មានថ្ងៃមកនេះមានអ្នកជេរសម្តេច និងជេរដល់ព្រះមហាក្សត្រថែមទៀត។

សម្តេចតេជោ ហ៊ុន សែន បានអំពាវនាវដល់ព្រះសង្ឃ និងប្រជាពលរដ្ឋឱ្យក្រោកឈរប្រឆាំងជនក្បត់ជាតិដែលប្រមាថព្រះមហាក្សត្រខ្មែរ ដើម្បីធានាការការពាររបបរាជានិយមការពាររាជបល្ល័ង្គ ការពារព្រះមហាក្សត្រ ការពារឯកភាព សន្តិភាព នៃទឹកដី។ ជាមួយគ្នានេះសម្តេចនាយករដ្ឋមន្រ្តីកម្ពុជាបានព្រមានចំពោះគណបក្សណាដែលផ្សារភ្ជាប់ជាមួយនឹងជនក្បត់ជាតិ នឹងត្រូវចាត់វិធានការច្បាប់។

សូមបញ្ជាក់ថា នាពេលថ្មីៗនេះ លោក សម រង្ស៊ី អតីតប្រធានគណបក្សប្រឆាំងបាននិយាយក្នុងឃ្លីបវីដេអូមួយប្រមាថចំពោះព្រះមហាក្សត្រកម្ពុជា ជាហេតុនាំឱ្យសាធារណជន និងអ្នកនយោបាយនៅកម្ពុជាប្រកាសថ្កោលទោសយ៉ាងខ្លាំង៕