បាត់ដំបង៖ ប្រជាកសិករប្រមាណ១ម៉ឺន ១៥០០គ្រួសារ ដែលរងផលប៉ះពាល់ដោយសារជំនន់ទឹកភ្លៀងនៅខេត្តបាត់ដំបងបានទទួលស្រូវពូជពីរាជរដ្ឋាភិបាល ដើម្បីមានលទ្ធភាពស្ដារការដាំដុះឡើងវិញ។ នៅក្នុងពិធីចែកស្រូវពូជ និងសំណេះសំណាលនាព្រឹកថ្ងៃទី២៤ ខែតុលា ឆ្នាំ២០២២នេះសម្តេចតេជោ ហ៊ុន សែន នាយករដ្ឋមន្ត្រីកម្ពុជាបានថ្លែងអំណរគុណចំពោះអាជ្ញាធរពាក់ព័ន្ធដែលជួយប្រជាពលរដ្ឋនៅពេលមានទុក្ខលំបាក។
សម្ដេចតេជោ ហ៊ុន សែន បានមានប្រសាសន៍លើកឡើងថា នៅកម្ពុជានិងពិភពលោកសុទ្ធតែជួបបញ្ហាប្រឈមដូចគ្នាទាំងអស់ដោយសារតែគ្រោះធម្មជាតិហើយរាជរដ្ឋាភិបាលក៏បានបញ្ចេញស្រូវពូជប្រមាណជា៧ពាន់តោនទៅដល់ប្រជាពលរដ្ឋ ដើម្បីមានលទ្ធភាពស្ដារឡើងវិញហើយបន្តយកចិត្តទុកដាក់ដល់ការស្ដារដំណាំផ្សេងៗទៅដល់ក្រុមគ្រួសារដែលមិនមានលទ្ធភាពក្នុងការធ្វើស្រូវឡើងវិញផងដែរ។
របាយការណ៍របស់ លោក សុខ លូ អភិបាលខេត្តបាត់ដំបងបានឱ្យដឹងថា ទឹកជំនន់ទឹកភ្លៀងបានបង្កឱ្យប៉ះពាល់ដល់១៤ក្រុង-ស្រុក (លើ៩១ឃុំសង្កាត់ និង៥០២ភូមិ) ក្នុងនោះបណ្តាលឱ្យរងផលប៉ះពាល់ដល់ប្រជាជនសរុបចំនួន ២៩,៣៨៤គ្រួសារ ក្នុងនោះបានជម្លៀសប្រជាជនទៅទីទួលសុវត្ថិភាពចំនួន ១,០៥១គ្រួសារ៕
