នៅក្នុងពិធីសំណេះសំណាលជាមួយពលរដ្ឋនៅខេត្តបន្ទាយមានជ័យនាព្រឹកថ្ងៃទី២៣ ខែតុលា ឆ្នាំ២០២២នេះ សម្តេចតេជោ ហ៊ុន សែន នាយករដ្ឋមន្ត្រីកម្ពុជាបានវាយតម្លៃខ្ពស់ចំពោះសកម្មភាពមន្រ្តីគ្រប់ជាន់ថ្នាក់ដែលបានចេញប្រតិបត្តការសង្រ្គោះពលរដ្ឋពីហានិភ័យគ្រោះទឹកជំនន់បានទាន់ពេលវេលា។
ជាមួយគ្នានេះសម្តេចនាយករដ្ឋមន្ត្រីកម្ពុជា បានមានប្រសាសន៍លើកឡើងដែរថា ទឹកជំនន់ដែលកើតឡើងពីគ្រោះធម្មជាតិគឺមិនអាចទៅហាមមិនឲ្យកើតបានទេ ប៉ុន្តែទាមទារឲ្យថ្នាក់ជាតិត្រូវអន្តរាគមន៍បន្ទាន់។
របាយការណ៍របស់អាជ្ញាធរបានឱ្យដឹងថា ជំនន់ទឹកភ្លៀងបានធ្វើឱ្យប៉ះពាល់ក្រុងស្រុកចំនួន៨ ក្នុងខេត្តបន្ទាយមានជ័យរួមមាន៖ ក្រុងសិរីសោភ័ណ ក្រុងប៉ោយប៉ែត ស្រុកមង្គលបុរី ស្រុកភ្នំស្រុក ស្រុកព្រះនេត្រព្រះ ស្រុកអូរជ្រៅ ស្រុកថ្មពួក និងស្រុកម៉ាឡៃ និងបង្កឱ្យប៉ះពាល់ដល់ប្រជាពលរដ្ឋប្រមាណ ១ម៉ឺន៥ពាន់គ្រួសារ៕
