សៀមរាប៖ សម្តេចតេជោ ហ៊ុន សែន នាយករដ្ឋមន្រ្តីកម្ពុជា បានអំពាវនាវដល់ប្រជាពលរដ្ឋដែលរស់នៅតំបន់អង្គរ ត្រូវចិត្តចាកចេញដោយភាពវៃឆ្លាត ខណៈយុទ្ធនាការសង្រ្គោះអង្គរ នឹងមិនរាថយទេ។

នៅក្នុងពិធីសំណេះសំណាលជាមួយប្រជាពលរដ្ឋ នៅតំបន់ពាក់ស្នែង នាព្រឹកថ្ងៃទី២២ ខែតុលា ឆ្នាំ២០២២នេះ សម្តេចតេជោ ហ៊ុន សែន នាយករដ្ឋមន្រ្តីកម្ពុជា បានមានប្រសាសន៍ថា អ្នករស់នៅជុំវិញតំបន់អង្គរ ពុំអាចសាងសង់អ្វីបន្ថែមបានទេ ព្រោះខុសគោលការណ៍ច្បាប់  ដូច្នេះគួរសម្រេចចិត្តចាកចេញឲ្យហើយ។ 

សម្ដេចតេជោ ហ៊ុន សែន ក៏ធ្លាប់បានប្រកាសដែរថា យុទ្ធនាការ នៃការសង្រ្គោះអង្គរ គឺមិនរាថយទេ ដូច្នេះអ្នករស់នៅខុសច្បាប់នៅតំបន់អង្គរ និងតំបន់អាជ្ញាធរអប្សរា សូមប្រញាប់សម្រេចចិត្តចាប់ឆ្នោតយកដីដែលរដ្ឋរៀបចំ។

សូមបញ្ជាក់ថា គិតត្រឹមថ្ងៃទី ២០ ខែតុលា ឆ្នាំ២០២២ មានពលរដ្ឋចំនួន ៩១៣៤គ្រួសារ បានស្ម័គ្រចិត្តទៅរស់នៅតំបន់អភិវឌ្ឍន៍ភូមិធម្មជាតិរុនតាឯក ស្ថិតក្នុងស្រុកបន្ទាយស្រី និងតំបន់អភិវឌ្ឍន៍ពាក់ស្នែង ស្ថិតនៅស្រុកអង្គរធំ ខេត្តសៀមរាប៕

អត្ថបទ៖លាង ឡា