ភ្នំពេញ៖ សមត្ថកិច្ចរាជធានីភ្នំពេញកំពុងធ្វើការស្រាវជ្រាវករណីបាញ់រះអស់ជាច្រើនគ្រាប់លើអគារខនដូមួយកន្លែងកាលពីយប់ទី២០ ខែតុលា ឆ្នាំ២០២២ ស្ថិតនៅតាមបណ្ដោយផ្លូវ១៣៤ ក្នុងសង្កាត់វាលវង់ ខណ្ឌ៧មករា។ សមត្ថកិច្ចបានឱ្យដឹងថា នាយប់ថ្ងៃកើតហេតុមានជនប្រដាប់អាវុធបានជិះរថយន្តចំនួន២គ្រឿងបាញ់រះអស់ជាច្រើនគ្រាប់ទៅលើអគារខុនដូ SKY LINE បង្កឲ្យមានការភ្ញាក់ផ្អើល ដល់កម្លាំងសមត្ថកិច្ចចុះអន្តរាគមន៍។

ប្រភពពីកន្លែងកើតហេតុបានឲ្យដឹងថា ជនសង្ស័យបានជិះរថយន្តចំនួន២គ្រឿងម៉ាកហ្វ៊តពណ៌ស និងម៉ាកអាលហ្វាតពណ៌ខ្មៅធ្វើដំណើរតាមបណ្ដោយផ្លូវ១៣៤ ទិសដៅពីកើតទៅលិចលុះមកដល់ចំណុចកើតហេតុក៏បាញ់រះបណ្ដាលឲ្យធ្លុះធ្លាយកញ្ចក់រួចបើករថយន្តគេចខ្លួនអស់តែម្ដង។ បច្ចុប្បន្ន សមត្ថកិច្ចបានប្រមូលវត្ថុតាងមួយចំនួនរក្សាទុកដើម្បីធ្វើការស្រាវជ្រាវចាប់ជនសង្ស័យទៅផ្ដន្ទាទោសតាមច្បាប់៕