ឧទ្យានជាតិកែបគឺជាឧទ្យានជាតិមួយនៅក្នុងខេត្តកែបរបស់ប្រទេសកម្ពុជាដែលត្រូវបានបង្កើតឡើងក្នុងឆ្នាំ១៩៩៣ និងមានផ្ទៃដី៦៦,៦គីឡូម៉ែត្រការ៉េ ហើយឧទ្យាននេះមានជួរភ្នំតូចមួយដែលមានផ្លូវ និងផ្លូវលំដែលពេញនិយមពីអ្នកទេសចរហើយក្រោយពីផ្លូវបេតុងព័ទ្ធជុំវិញត្រូវបានស្ថាបនារួចឧទ្យានជាតិនេះកាន់តែមានភាពទាក់ទាញសម្រាប់ភ្ញៀវទេសចរណ៏ជាតិ អន្តរជាតិ នេះបើតាមការបញ្ជាក់ពីអាជីវករអ្នករកស៊ីលក់ដូរនៅទីនោះ ។

ម្ចាស់ហាងកាហ្វេមួយបាននិយាយថា បច្ចុប្បន្នការលក់ដូរ នំចំណី និងកាហ្វេផ្សេងៗដាច់ជាងមុនព្រោះភ្ញៀវមកកម្សាន្តច្រើន ហើយតាមការកត់សម្គាល់សន្ទុះភ្ញៀវចាប់ផ្តើមកើនឡើងក្រោយពីមានផ្លូវឡើងលើភ្នំត្រូវបានស្ថាបនា។ ចំណែកលោកសុជាតិ អ្នកគ្រប់គ្រងរីស៊តមួយនៅទីនោះបានរៀបរាប់ថា ក្រោយពីរាជរដ្ឋាភិបាលបើកប្រទេសដើម្បីដំណើរការសេដ្ឋកិច្ចឡើងវិញខេត្តកែបមានកំណើនភ្ញៀវទេសចរជាលំដាប់។ សម្រាប់រីស៊តក៏មានភ្ញៀវមកស្នាក់នៅច្រើនក្រោយពេលមានផ្លូវល្អថែមទាំងបានប្រើប្រាស់សេវាកម្សាន្តផ្សេងៗនៅក្នុងឧទ្យានជាតិកែបក្បែរទីតាំងនេះផងដែរ។

សូមបញ្ជាក់ថា ឧទ្យានជាតិកែបមានទីតាំងស្ថិតនៅកណ្តាលក្រុងគ្របដណ្តប់លើផ្ទៃដីទំហំ១.១៥២ហិកតា។ ឧទ្យានជាតិនេះមានធនធានធម្មជាតិប្រកបដោយសក្តានុពលជាច្រើន។ ក្នុងនោះរួមមាន ព្រៃឈើ ជីវៈចម្រុះ សត្វព្រៃច្រើនប្រភេទពិសេសសត្វស្វារាប់ពាន់ក្បាលមានរូងភ្នំ និងល្អាងដ៏ល្អប្រណីត។ ជាគោលដៅទៅអនាគត អាជ្ញាធរ នឹងរៀបចំឧទ្យាននេះជាតំបន់ទេសចរណ៍ធម្មជាតិ ដើម្បីអភិរក្សការពារ និងទប់ស្កាត់ការទន្ទ្រានយកដីរដ្ឋ។ ឧទ្យានជាតិនេះក៏ជាបេះដូងទេសចរណ៍នៃខេត្តកែបផងដែរ ឧទ្យាននេះផ្តល់នូវធនធានសមុទ្រដ៏ច្រើនដល់ប្រជាជនក្នុងតំបន់ផងដែរដូចជា ត្រី ក្តាម បង្គា មឹក លៀស ខ្យង ងាវជាដើម។

គួររំលឹកថា ផ្លូវបេតុងប្រវែង៦គីឡូម៉ែត្រស្ថិតនៅភ្នំកែបធំនៃឧទ្យានជាតិកែប ដែលប្រសិទ្ធិនាមថា “រុក្ខវិថីបុប្ជាប្រសិទ្ធ” ត្រូវបានសម្ពោធដាក់ឱ្យប្រើប្រាស់ជាផ្លូវការកាលពីថ្ងៃទី០៤ ខែឧសភា ឆ្នាំ២០២២ ក្រោមអធិបតីភាពឯកឧត្តម សាយ សំអាល់ រដ្ឋមន្ត្រីក្រសួងបរិស្ថាន៕