ភ្នំពេញ៖ សពកុមារចុងក្រោយ ដែលរងគ្រោះដោយសារករណីលិចទូកចម្លង នៅចំណុចភូមិកោះចំរើន ឃុំកំពង់ភ្នំ ស្រុកលើកដែក ខេត្តកណ្ដាល ត្រូវបានរកឃើញនៅព្រឹកថ្ងៃទី១៥ ខែតុលានេះ ខណៈកុមារដែលបាត់បង់ជីវិត មានចំនួនសរុបទាំងអស់១១នាក់ និងរស់រានមានជីវិត ចំនួន៤នាក់។

របាយការណ៍របស់ស្នងការដ្ឋាន នគរបាលខេត្តកណ្ដាល បានឱ្យដឹងថា អ្នកដែលបានរួចផុតពីគ្រោះថ្នាក់ រួមមាន ៖១-ឈ្មោះ ថេត គន្ធី ភេទប្រុស អាយុ ១៥ ឆ្នាំ មុខរបរ កម្មករបើកទូកដរ,២-ឈ្មោះ វណ្ណី រដ្ឋា ភេទប្រុស អាយុ២៣ ឆ្នាំ មុខរបរ កម្មករបើកទូកដរទទឹង,៣-ឈ្មោះ វី ចាន់ប៊ូរ៉ា ភេទស្រី អាយុ ១២ ឆ្នាំ មុខរបរសិស្ស និងទី៤-ឈ្មោះ រឿន សា ភេទប្រុស អាយុ១៥ឆ្នាំ មុខរបរសិស្ស។

របាយការណ៍បានឱ្យដឹងដែរថា កុមារដែលបានស្លាប់ដោយសារការលិចទូកចម្លងទាំង១១នាក់ មានអាយុចាប់ពី១២ឆ្នាំ ដល់១៤ឆ្នាំ។

សូមបញ្ជាក់ថា ករណីលិចទូកចម្លងនេះ បានកើតឡើងកាលពីយប់ថ្ងៃទី១៣ ខែតុលា ឆ្នាំ២០២២ ត្រង់ចំណុចភូមិកោះចំរើន ឃុំកំពង់ភ្នំ ស្រុកលើកដែក ខេត្តកណ្ដាល។ភ្លាមៗក្រោយពេលមានហេតុការណ៍កើតឡើង អាជ្ញាធរបានចេញអន្តរាគមន៍ជួយសង្រ្គោះ ដោយប្រើរយៈពេល២យប់៣ថ្ងៃ គិតចាប់ពីយប់ថ្ងៃទី១៣ ដល់ថ្ងៃទី១៥ ខែតុលា៕

អត្ថបទ៖លាង ឡា