ក្រុមហ៊ុន Cambodia Airports ដែលជាក្រុមហ៊ុន អភិវឌ្ឍន៍ព្រលានយន្តហោះ ខេត្តព្រះសីហនុ គ្រោងនឹងអភិវឌ្ឍន៍ព្រលានយន្តហោនេះ ឲ្យក្លាយជាព្រលានយន្តហោះអន្តរជាតិ ដែលមានលក្ខណៈទំនើបស៊ីវិល័យ ដើម្បីទាក់ទាញភ្ញៀវទេសចរអន្តរជាតិកាន់តែច្រើនបន្ថែមទៀត នេះបើតាមការឲ្យដឹងពីលោក Cyril Girot នាយកប្រតិបត្តិនៃក្រុមហ៊ុន Cambodia Airport។
លោកបញ្ជាក់បែបនេះ នៅក្នុងជំនួបពិភាក្សាការងារជាមួយលោក គួច ចំរើន អភិបាលនៃគណៈអភិបាលខេត្តព្រះសីហនុ កាលពីរសៀលថ្ងៃទី១៣ ខែតុលា ឆ្នាំ២០២២។
លោក Cyril Girot ឲ្យដឹងថា ក្រុមហ៊ុនទទួលបានសេចក្ដីប្រកាសអន្តរក្រសួង ស្ដីពីការអភិវឌ្ឍអាកាសយានដ្ឋានអន្តរជាតិខេត្តព្រះសីហនុ។ ក្រុមហ៊ុនរង់ចាំសហការ ដើម្បីធ្វើការអភិវឌ្ឍអាកាសយានដ្ឋានអន្តរជាតិខេត្តព្រះសីហនុឲ្យកាន់តែមានភាពទាក់ទាញសម្រាប់ភ្ញៀវទេសចរជាតិ អន្តរជាតិ។ ក្នុងនោះ ដោយសារខេត្តព្រះសីហនុ មានការអភិវឌ្ឍរីកចម្រើន ជាទស្សនវិស័យនៃទីក្រុងឆ្លាតវៃនាពេលខាងមុខ ដែលជាចលនាលំហូរភ្ញៀវទេសចរចូលមកខេត្តព្រះសីហនុ ជាពិសេសអ្នកវិនិយោគចិន។
លោកបានបន្តទៀតថា ក្រុមហ៊ុន នឹងចូលរួមសហការជាមួយលោកអភិបាលខេត្ត ក្នុងការដោះស្រាយបញ្ហាប្រព័ន្ធរំដោះទឹកនៅជុំវិញអាកាសយានដ្ឋានកាន់តែល្អប្រសើរ។
ចំណែកលោក គួច ចំរើន បានថ្លែងអំណរគុណក្រុមហ៊ុន ដែលបានអភិវឌ្ឍន៍អាកាសយានដ្ឋានអន្តរជាតិខេត្តព្រះសីហនុ ដែលជាផ្នែកមួយ នៃសក្ដានុពលរបស់ខេត្ត។ លោកចាត់ឲ្យក្រុមការងារបច្ចេកទេស សហការជាមួយក្រុមហ៊ុន Cambodia Airports ចុះពិនិត្យប្រព័ន្ធរំដោះទឹកជុំវិញអាកាសយានដ្ឋាននៅថ្ងៃស្អែក ដើម្បីដោះស្រាយបញ្ហាប្រឈមឲ្យទទួលបានលទ្ធផលល្អ។
ក្នុងជំនួបពិភាក្សានោះ លោកអភិបាលខេត្ត បានជម្រាបជូនក្រុមហ៊ុនថា រដ្ឋបាលខេត្តត្រូវការព័ត៌មានជាក់លាក់ នៃការអភិវឌ្ឍរបស់ក្រុមហ៊ុន Cambodia Airports ដើម្បីដាក់បញ្ចូលក្នុងផែនការមេ ហើយយើងក៏ត្រូវការគាំទ្រគ្នាទៅវិញទៅមកផងដែរ ដើម្បីប្រែក្លាយខេត្តព្រះសីហនុ ជាតំបន់ឧស្សាហកម្ម តំបន់ស្នាក់នៅប្រកបដោយចិរភាព ជំរុញទីផ្សារហិរញ្ញវត្ថុ។ បន្ថែមនោះ យើងក៏មានគោលដៅវែងឆ្ងាយរង់ចាំដៃគូវិនិយោគ ដោយសារខេត្តព្រះសីហនុ ជាផ្នែកមួយនៃរាជធានីភ្នំពេញ ដែលមានក្រុមហ៊ុន សហគ្រាសជាសាខា។ ទន្ទឹមនោះ យើងចង់បង្កើតទីនេះ ជាមូលដ្ឋានសេដ្ឋកិច្ច ដែលមានក្រុមហ៊ុនឈរជើង ស្នាក់នៅ ប្រកបរបរនៅទីនេះ។
សូមបញ្ជាក់ថា អាកាសយានដ្ឋានខេត្តព្រះសីហនុ ទើបតែបញ្ចប់ការពង្រីកផ្លូវរត់សម្រាប់យន្តហោះខ្នាតធំ កាលពីដំណាច់ឆ្នាំ២០២០ ដែលធ្វើឲ្យមានលទ្ធភាពតភ្ជាប់ការហោះហើរទៅកាន់ទ្វីបអឺរ៉ុប និងតំបន់មជ្ឈិមបូព៌ា សម្រាប់ទាក់ទាញភ្ញៀវទេសចរ និងអ្នកវិនិយោគទៅកាន់ខេត្តតំបន់សមុទ្រនេះ៕ (មានជ័យ)
