ព្រះសីហនុ៖ ក្នុងសប្តាហ៍ទី២ នៃខែតុលា ឆ្នាំ២០២២ ខេត្តព្រះសីហនុ បានទទួលភ្ញៀវទេសចរផ្ទៃក្នុងសរុបចំនួន១២៨.៣០៧នាក់ កើនឡើង១០២,៦៣ភាគរយ ក្រោយពេលរដ្ឋាភិបាលបានអនុញ្ញាតឱ្យប្រើប្រាស់សាកល្បងផ្លូវល្បឿន ភ្នំពេញ-ព្រះសីហនុ។ របាយការណ៍របស់មន្ទីរទេសចរណ៍ខេត្តព្រះសីហនុបានបញ្ជាក់ថា ភ្ញៀវទេសចរដែលទៅលេងកម្សាន្តក្នុងនោះមានភ្ញៀវជាតិចំនួន១២៣.៨៧៩នាក់ កើនឡើង១០៦,១៦ភាគរយ និងភ្ញៀវបរទេសសរុប៤.៤២៨នាក់ កើនឡើង៣៧ភាគរយ។
របាយការណ៍ដដែលបានឱ្យដឹងដែរថា ភ្ញៀវទៅកម្សាន្តនៅខេត្តព្រះសីហនុចុងសប្ដាហ៍ថ្ងៃសៅ និងអាទិត្យមានចំនួនប្រមាណ១១.០០០០ នាក់ ដោយសារការបើកឲ្យធ្វើដំណើរមិនគិតប្រាក់តាមផ្លូវល្បឿនលឿនខណៈភ្ញៀវចូលតាមព្រលានយន្តហោះអន្តរជាតិខេត្តព្រះសីហនុមានចំនួន៣៦៨នាក់កើនឡើង០,៨២ភាគរយ។
សូមបញ្ជាក់ដែរថា ផ្លូវល្បឿនលឿន ភ្នំពេញ-ព្រះសីហនុ ត្រូវបានរាជរដ្ឋាភិបាលកម្ពុជា អនុញ្ញាតដាក់ឱ្យដំណើរការសាកល្បងមិនគិតប្រាក់រយៈពេលពេញ១ខែចាប់ពីថ្ងៃទី១ ខែតុលា ឆ្នាំ២០២២។ នៅក្នុងដំណើរការសាកល្បងនាថ្ងៃទី១ ខែតុលាកន្លងទៅនេះ មានយានយន្តជិត៩០០០គ្រឿងក្នុង១ថ្ងៃបានធ្វើចរាចរណ៍ឆ្លងកាត់ ដើម្បីទទួលយកបទពិសោធន៍បើកបរថ្មីខណៈមន្រ្តីបានអំបាវនាវដល់អ្នកប្រើប្រាស់ផ្លូវត្រូវប្រកាន់ភ្ជាប់នូវគោលការណ៍សុវត្ថិភាព និងច្បាប់ចរាចរណ៍៕
