ភ្នំពេញ៖ រដ្ឋមន្ត្រីក្រសួងមហាផ្ទៃបានជំរុញឱ្យក្រុមការងារពាក់ព័ន្ធ ដែលរៀបចំសេចក្ដីព្រាងអនុក្រឹត្យស្ដីពីអាកាសយានគ្មានមនុស្សបើក(ដ្រូន)បន្តរពិភាក្សាចំណុចមិនទាន់ទាន់ច្បាស់លាស់មួយចំនួន ដែលពាក់ព័ន្ធនឹងការទទួលខុសត្រូវរបស់ក្រសួងមហាផ្ទៃ។ មានប្រសាសន៍ក្នុងកិច្ចប្រជុំពិនិត្យពិភាក្សាសេចក្ដីព្រាងអនុក្រឹត្យស្ដីពីអាកាសយានគ្មានមនុស្សបើក(ដ្រូន)កាលពីរសៀលថ្ងៃទី៦ ខែតុលា ឆ្នាំ២០២២ សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃបានលើកឡើងថា សេចក្ដីព្រាងអនុក្រឹត្យស្តីពីការគ្រប់គ្រងអាកាសយានគ្មានមនុស្សបើក ឬដ្រូនមាន៨ជំពូកនិង៣៥មាត្រានិងមានគោលបំណងគ្រប់គ្រងដើម្បីធានាសន្តិសុខនៅកម្ពុជា។

ថ្លែងក្នុងកិច្ចប្រជុំនេះលោក ប៊ុន ហុន រដ្ឋលេខាធិការក្រសួងមហាផ្ទៃបានលើកឡើងថា សេចក្តីព្រាងអនុក្រឹត្យនេះមានការចូលរួមផ្តល់ធាតុចូលពីក្រុមប្រឹក្សានីតិកម្មនិងអង្គភាពពាក់ព័ន្ធនានាចំណុះក្រសួងមហាផ្ទៃចំនួនជាង៤០លើក។ លោកបញ្ចាក់ថា សេចក្ដីព្រាងអនុក្រឹត្យនេះបានឆ្លងកាត់កិច្ចប្រជុំអន្តរក្រសួងជាបន្តបន្ទាប់ដោយមានការចូលរួមពីក្រសួងមហាផ្ទៃក្រសួងយុត្តិធម៌ ក្រសួងសេដ្ឋកិច្ច និងហិរញ្ញវត្ថុ ក្រសួងឧស្សាហម្ម វិទ្យាសាស្ត្របច្ចេកវិទ្យា និងនវានុវត្តន៍ ក្រសួងពាណិជ្ជកម្ម ក្រសួងប្រៃសណីយ៍ និងទូរគមនាគមន៍ ក្រសួងព័ត៌មាន និងរដ្ឋលេខាធិការដ្ឋានអាកាសចរស៊ីវិល ផងដែរ។

លោក ប៊ុន ហុន បានលើកឡើងដែរថា ក្រុមការងាររៀបចំតាក់តែងសេចក្តីព្រាងអនុក្រឹត្យនេះបានដឹកនាំអង្គភាពពាក់ព័ន្ធធ្វើការសិក្សាស្រាវជ្រាវនូវលិខិតបទដ្ឋានគតិយុត្តពាក់ព័ន្ធលើការគ្រប់គ្រងការប្រើប្រាស់អាកាសយានគ្មានមនុស្សបើក(ដ្រូន)ពីបណ្តាប្រទេសជាច្រើននៅតំបន់អ៊ឺរ៉ុប សហរដ្ឋអាមេរិក តំបន់អាស៊ី ដូចជានៅប្រទេស ជប៉ុន ចិន សឹង្ហបុរី ថៃ និងវៀតណាមជាដើម៕