ភ្នំពេញ៖ លោក ឃួង ស្រេង អភិបាលរាជធានីភ្នំពេញបានណែនាំដល់មន្ទីរជំនាញឱ្យជួសជុលផ្លូវខូចខាត និងរៀបចំសោភ័ណភាពតាមដងវិថីសំខាន់ៗដើម្បីស្វាគមន៍គណៈប្រតិភូបរទេសដែលមកចូលរួមកិច្ចប្រជុំកំពូលអាស៊ាននាពេលខាងមុខ។
នៅក្នុងកិច្ចប្រជុំជាមួយអ្នកពាក់ព័ន្ធកាលពីរសៀលថ្ងៃទី៦ ខែតុលា ឆ្នាំ២០២២ អភិបាលរាជធានីភ្នំពេញលោក ឃួង ស្រេង បានលើកឡើងពីការតុបតែងការបំពាក់ភ្លើងបំភ្លឺ ការរៀបចំសួនច្បារនិងការរៀបចំឡើងវិញនូវហេដ្ឋារចនាសម្ព័ន្ធមហាវិថីមួយចំនួនទៀត។
លោក ឃួង ស្រេង បានបញ្ជាក់ថា នាឆ្នាំ២០២២នេះកម្ពុជាត្រូវធ្វើជាម្ចាស់ផ្ទះនៃកិច្ចប្រជុំកំពូលអាស៊ាន និងត្រូវធ្វើជាម្ចាស់ផ្ទះនៃការប្រកួតកីទ្បាស៊ីហ្គេមលើកទី៣២ និងអាស៊ានប៉ារ៉ាហ្គេមលើកទី១២ ឆ្នាំ២០២៣ ថែមទៀត។ ដូច្នេះការងារដែលត្រូវអនុវត្តគឺរួមគ្នាធ្វើយ៉ាងណាឱ្យភ្នំពេញមានសោភ័ណភាពស្រស់ស្អាតដើម្បីទទួលប្រតិភូដល់ជាង ៤០ប្រទេសដែលត្រូវមកប្រជុំនៅរាជធានីភ្នំពេញ។
សូមជម្រាបថា កិច្ចប្រជុំកំពូលអាស៊ានឆ្នាំ២០២២ និងកិច្ចប្រជុំពាក់ព័ន្ធនៅកម្ពុជានឹងធ្វើឡើងចាប់ពីថ្ងៃ១០-១៣ ខែវិច្ឆិកា ឆ្នាំ២០២២ ដោយក្នុងនោះនឹងមានគណៈប្រតិភូបរទេសមកចូលរួមកិច្ចប្រជុំប្រមាណ២៨គណៈប្រតិភូផងដែរ៕
