ភ្នំពេញ៖ សម្ដេចតេជោ ហ៊ុន សែន នាយករដ្ឋមន្ត្រីកម្ពុជាបានប្រកាសបញ្ជូនមន្រ្តីជាន់ខ្ពស់ចំនួន២រូប ដើម្បីទៅជួបនិងពន្យល់ដល់ប្រជាពលរដ្ឋនៅឃុំព្រះដាក់ ស្ថិតក្នុងស្រុកបន្ទាយស្រី ខេត្តសៀមរាប អំពីផែនការរបស់រដ្ឋក្នុងការការពារប្រាសាទបេតិកភណ្ឌតំបន់អង្គរបន្ទាប់ពីមានប្រតិកម្មតវ៉ាពីពលរដ្ឋមួយចំនួន។
មានប្រសាសន៍ក្នុងពិធីបើកសន្និសីទចក្ខុវិស័យកម្ពុជាឆ្នាំ២០២២ ការស្តារឡើងវិញការអភិវឌ្ឍប្រកបដោយនិរន្តភាពបន្ទាប់ពីវិបត្តិជំងឺកូវីដ-១៩នាព្រឹកថ្ងៃទី៦ ខែតុលា ឆ្នាំ២០២២នេះសម្ដេចតេជោ ហ៊ុន សែន បានថ្លែងថា សម្ដេចនឹងបញ្ជូនលោកឧបនាយករដ្ឋមន្រ្តី ជា សុផារ៉ា រដ្ឋមន្រ្តីក្រសួងដែនដីនគររូបនីយកម្មនិងសំណង់ និងលោកស្រី ភឿង សកុណា រដ្ឋមន្រ្តីក្រសួងវប្បធម៌និងវិចិត្រសិល្បៈ ដើម្បីជួបជាមួយប្រជាពលរដ្ឋនៅថ្ងៃស្អែក។
សម្ដេចតេជោ ហ៊ុន សែន នាយករដ្ឋមន្ត្រីកម្ពុជាបានផ្ញើសារទៅប្រជាពលរដ្ឋនៅឃុំព្រះដាក់ ស្រុកបន្ទាយស្រី ខេត្តសៀមរាប “សូមរក្សាភាពស្ងប់ស្ងាត់ ស្ងប់ចិត្ត និងថារដ្ឋមិនទៅរុះរើទេ។ សម្ដេចតេជោបានមានប្រសាសន៍លើកឡើងដែរថា ការបញ្ជូនមន្រ្តីជាន់ខ្ពស់ទៅជួបពលរដ្ឋនៅឃុំព្រះដាក់នេះដើម្បីពិនិត្យទៅលើបញ្ហាបរិស្ថានក្នុងន័យការពារប្រាសាទបេតិកភណ្ឌតែប៉ុណ្ណោះគឺមិនបានឲ្យពលរដ្ឋរុះរើឡើយហើយក៏មិនធ្វើរហូតដល់រំលាយឃុំព្រះដាក់ដែរ។
សូមបញ្ជាក់ថា នាពេលថ្មីៗនេះរាជរដ្ឋាភិបាលកម្ពុជាបានរៀបចំតំបន់ រុនតាឯក ស្ថិតក្នុងឃុំ រុនតាឯក ស្រុកបន្ទាយស្រី ខេត្តសៀមរាប ជាតំបន់តំបន់អភិវឌ្ឍន៍ធម្មជាតិសម្រាប់ប្រជាពលរដ្ឋដែលបានផ្លាស់ទីពីតំបន់ទី១ និងតំបន់ទី២ នៃរមណីយដ្ឋានអង្គរ៕
