លោក គង់ ពុទ្ធិការ អគ្គនាយកអាជ្ញាធរជាតិព្រះវិហារអមដំណើរដោយអគ្គនាយករងប្រធាន អនុប្រធាននាយកដ្ឋាន និងមន្ត្រីជំនាញកាលពីថ្ងៃអាទិត្យ ថ្ងៃទី០២ ខែតុលា ឆ្នាំ២០២២ បានចុះពិនិត្យតាមដានលើកិច្ចការងារអភិរក្សនិងផលប៉ះពាល់ទៅលើសំណង់ប្រាសាទដោយសារកត្តាធម្មជាតិនិងពិភាក្សាលើការងារអភិវឌ្ឍន៍ក្នុងរមណីយដ្ឋានប្រាសាទកោះកេ់រ។ បើតាមលោក គង់ ពុទ្ធិការ សកម្មភាពនោះគឺ៖

ទី១-ដើម្បីពិនិត្យស្ថានភាពតាមប្រាសាទក្រោយរងនូវឥទ្ធិពលព្យុះ Naru និងពិភាក្សាបច្ចេកទេសលើការងារអភិរក្សប្រាសាទឥដ្ឋនៅក្នុងបរិវេណប្រាសាទក្រចាប់។

ទី២-ដើម្បីពិនិត្យ និងពិភាក្សាលើទីតាំងសាងសង់ចំណតថ្មីនៅភាគឦសាននៃប្រាសាទធំនិងរៀបចំធ្វើផ្លូវវង់ទស្សនាថ្មីក្នុងរមណីយដ្ឋានប្រាសាទកោះកេរសម្រាប់សម្រួលដល់ភ្ញៀវទេសចរមកទស្សនាក្នុងរមណីយដ្ឋានប្រាសាទកោះកេរ។

គួររំលឹកថា ថ្មីៗនេះគណៈប្រតិភូនៃសន្និសីទអន្តរជាតិស្តីពីកិច្ចការពារ​និងទប់ស្កាត់ចរាចរជួញដូរសម្បត្តិវប្បធម៌ខុសច្បាប់​មកពីតំបន់អាស៊ីអឺរ៉ុបនិងសហរដ្ឋអាមេរិកបានមកទស្សនកិច្ចនៅប្រាសាទមួយចំនួនក្នុងរមណីយដ្ឋានប្រាសាទកោះកេរ​រួមមានប្រាសាទក្រចាប់ ប្រាសាទចិន  និងក្រុមប្រាសាទធំ៕