អគ្គនាយករងនៃអគ្គនាយកដ្ឋានអភិវឌ្ឍន៍ទេសចរណ៍និងសហប្រតិបត្តិការអន្តរជាតិលោក អាំង សុវណ្ណរ័ត្ន បានអះអាងថា ក្រសួងទេសចរណ៍បាននិងកំពុងរៀបចំបោះពុម្ភផ្សាយជាខិត្តប័ណ្ណកូនសៀវភៅ ឬជា Pocket Guidebook នូវផែនទីទេសចរណ៍ម្ហូបអាហារកម្ពុជាដើម្បីទាក់ទាញភ្ញៀវទេសចរណ៍បរទេសបន្ថែមទៀត។

បើតាមលោក អាំង សុវណ្ណរ័ត្ន ខិតប័ណ្ណនោះនឹងមានបញ្ជាក់ពីម្ហូបអាហារនៅតាមខេត្ត និងតំបន់សម្រាប់បង្កើនការទាក់ទាញភ្ញៀវទេសចរដែលនិយមចូលចិត្តទទួលទានម្ហូបអាហារអាច​ស្វែងយល់ពីម្ហូបអាហារប្រចាំតំបន់។ លោកថា បច្ចុប្បន្នក្រសួងបានរៀបចំជា Soft បណ្ដើរៗហើយក្នុងពេលឆាប់ៗខាងមុខនឹងបោះពុម្ភ​សម្រាប់ចែកជូនដល់ភ្ញៀវទេសចរទាំងអស់នៅតាមមណ្ឌលព័ត៌មានទេសចរណ៍គ្រប់រាជធានី-ខេត្ត។

ផែនទីទេសចរណ៍ម្ហូបអាហារ​នេះ នឹងមានរំលេចអំពីរូបភាពបញ្ជាក់ពីឈ្មោះម្ហូបអាហារប្រវត្តិរបៀបធ្វើ ដើម្បីទាក់ទាញភ្ញៀវឱ្យងាយស្រួលក្នុងការឈ្វេងយល់ពីព្រោះជូនកាលភ្ញៀវទេសចរបានភ្លក្សរសជាតិហើយបើបានដឹងប្រវត្តិទៀតគឺពួកគេកាន់តែជក់ចិត្ត។ ក្រុមជំនាញក៏នឹងមានការបកប្រែជាភាសាអង់គ្លេស និងភាសាបរទេសផ្សេងៗ សម្រាប់បង្កើនភាពទាក់ទាញភ្ញៀវទេសចរគ្រប់ជាតិសាសន៍។

គួររំលឹកថា ទេសចរណ៍ម្ហូបអាហារនេះគឺជាសក្ដានុពលធំសម្រាប់គោលដៅទេសចរណ៍នីមួយៗហើយក៏ជាអនុវិស័យមួយក្នុងវិស័យទេសចរណ៍និងវប្បធម៌ដែលមានភាពទាក់ទាញយ៉ាងសំខាន់សម្រាប់ភ្ញៀវទេសចរ។ ការបញ្ជាក់របស់លោក អាំង សុវណ្ណរ័ត្ន អគ្គនាយករងនៃអគ្គនាយកដ្ឋានអភិវឌ្ឍន៍និងសហប្រតិបត្តិការអន្តរជាតិនៃក្រសួង ទេសចរណ៍បានធ្វើឡើងនៅក្នុងក្នុងសន្និសីទស្ដីពីសមិទ្ធផលនិងវឌ្ឍនភាពការងាររយៈពេល៥ឆ្នាំរបស់ក្រសួងទេសចរណ៍កាលពីចុងសប្តាហ៍កន្លងទៅ៕