ភ្នំពេញ៖ សម្តេចតេជោ ហ៊ុន សែន នាយករដ្ឋមន្រ្តីកម្ពុជាបានព្រមានមិនផ្ដល់ផលប្រយោជន៍ណាមួយចំពោះពលរដ្ឋដែលមិនព្រមរុះរើលំនៅឋានចាកចេញពីតំបន់អង្គរទៅកាន់តំបន់អភិវឌ្ឍន៍ថ្មី។ នៅក្នុងប្រគល់សញ្ញាបត្រជូនដល់និសិ្សតវិទ្យាស្ថាន វ៉ាន់ដា នាព្រឹកថ្ងៃទី០៣ ខែតុលា ឆ្នាំ២០២២នេះ សម្តេចតេជោ ហ៊ុន សែន នាយករដ្ឋមន្រ្តីកម្ពុជា បានមានប្រសាសន៍ថា មានពលរដ្ឋមួយចំនួនបានជឿតាមការញុះញ៉ង់ និងព្រមចាកចេញពីតំបន់អង្គរទៅទីតាំងថ្មីដោយសារចាំតថ្លៃជាថ្នូនឹងការចាកចេញ។
សម្តេចនាយករដ្ឋមន្រ្តីកម្ពុជា បានអំពាវនាវដល់អ្នករស់នៅខុសច្បាប់ក្នុងតំបន់អង្គរឱ្យឆាប់ចាកចេញទៅកាន់លំនៅឋានថ្មីដើម្បីទទួលបានផលប្រយោជន៍ច្រើនពីរាជរដ្ឋាភិបាល ប៉ុន្តែបើថ្ងៃឱសានវាទណាមួយមកដល់នោះនឹងមិនទទួលបានផលអ្វីទាំងអស់ពីរដ្ឋ។
សូមបញ្ជាក់ថា រាជរដ្ឋាភិបាលកម្ពុជាបានរៀបចំភូមិធម្មជាតិរុនតាឯក ស្ថិតក្នុងឃុំ រុនតាឯក ស្រុកបន្ទាយស្រី ខេត្តសៀមរាប ជាតំបន់តំបន់អភិវឌ្ឍន៍សម្រាប់ប្រជាពលរដ្ឋដែលបានផ្លាស់ទីពីតំបន់ទី១និងតំបន់ទី២នៃរមណីយដ្ឋានអង្គរ និងមានចម្ងាយប្រមាណ១.៥២ គីឡូម៉ែត្រពីប្រាសាទអង្គរវត្ត។ លោកឧបនាយករដ្ឋមន្រ្តី ជា សុផារ៉ា រដ្ឋមន្រ្តីក្រសួងដែនដីនគររូបនីយកម្មនិងសំណង់បានឱ្យដឹងថា គិតចាប់ពីថ្ងៃចាប់ឆ្នោតដំបូងនាថ្ងៃទី២៥ ខែសីហា រហូតមកដល់ថ្ងៃទី៣០ ខែកញ្ញា ឆ្នាំ២០២២នេះ មានប្រជាពលរដ្ឋសរុបចំនួន ៣៩៧០គ្រួសារហើយ ដែលបានមកចាប់ឆ្នោត៕
