ភ្នំពេញ ៖ យានយន្តចំនួន១៧០គ្រឿង ត្រូវបានសមត្ថកិច្ចពិន័យតាមអនុក្រឹត្យលេខ៣៩.អនក្រ.បក ក្រោយពេលរកឃើញថា បានបើកបរល្មើសច្បាប់ចរាចរណ៍ផ្លូវគោកនៅទូទាំងប្រទេស។
របាយការណ៍ពីនាយកដ្ឋាននគរបាលចរាចរណ៍និងសណ្តាប់ធ្នាប់សាធារណៈបានឱ្យដឹងថា ការរឹតបន្ដឹងការអនុវត្តច្បាប់ស្ដីពីចរាចរណ៍ផ្លូវគោកកាលថ្ងៃទី១ ខែតុលានេះបានអនុវត្តលើគោលដៅសរុប ១០២ និងមានយានយន្តចូលគោលដៅចំនួន ១.៦៨៤គ្រឿង, ម៉ូតូចំនួន ១.៦១២គ្រឿង ដោយរកឃើញយានយន្តល្មើសសរុបចំនួន ១៧០គ្រឿង មានម៉ូតូចំនួន ១៣៤គ្រឿង ត្រូវបានពិន័យតាមអនុក្រឹត្យលេខ៣៩.អនក្រ.បក នៅទូទាំងប្រទេស ។
របាយការណ៍បញ្ជាក់ថា ក្នុងរយៈពេល១ថ្ងៃនៃដើមខែតុលានេះការអនុវត្តតាមអនុក្រឹត្យការផាកពិន័យយានយន្តល្មើសបានដំណើរការទៅយ៉ាងល្អដោយទទួលបានការគាំទ្រពីអ្នកប្រើប្រាស់ផ្លូវ។
សូមរម្លឹកដែរថា នៅក្នុងត្រីមាសទី១ឆ្នាំ២០២២ ជនរងគ្រោះក្នុងករណីគ្រោះថ្នាក់ចរាចរណ៍ ដែលបណ្តាលឱ្យស្លាប់ដោយសារជិះម៉ូតូមានចំនួនប្រមាណ៨០ភាគរយ ក្នុងនោះ ៧០ភាគរយ មិនបានពាក់មួកសុវត្ថិភាពហើយភាគច្រើននៃអ្នកស្លាប់ ជាអ្នកបើកបរម៉ូតូ៕
