កាលពីថ្ងៃទី២៩ ខែកញ្ញាម្សិលមិញនេះ មានដំណើរការនៃការចាក់បញ្ចាំងជាលើកដំបូងនូវរឿង «លោកគ្រូប្រពន្ធល្អ» នៅឯក្នុងរោងភាពយន្ត Major Cineplex នៅក្នុងផ្សារទំនើបAeon2។ ភ្ញៀវកិត្តិយសជាច្រើនរូបមកពីមជ្ឈដ្ឋានខុសៗគ្នាបានអញ្ជើញចូលរួមទស្សនាការផ្សាយលើកដំបូងនេះចាប់ពីល្ងាចម៉ោង៧តទៅ។ សង្កេតឃើញថាមានទស្សនិកជនបានតំរង់ជួរជាច្រើនដើម្បីចូលរួមទស្សនាការចាក់ផ្សាយលើកដំបូងនេះ និងបានបង្ហាញចំណាប់អារម្មណ៍សប្បាយរីករាយក្រោយពីបានទស្សនាខ្សែភាពយន្តដែលត្រូវបានផលិតដោយផលិតកម្មកងចក្រភីកឈ័រសហការជាមួយផលិតកម្មដើមត្នោត។​​​ គួរបញ្ជាក់ផងដែរថាខ្សែភាពយន្តមួយរឿងនេះត្រូវបាននិពន្ធឡើងនិងដឹកនាំសម្តែងឡើងដោយលោកគ្រូ ឆាយបូរ៉ា និងត្រូវបានសម្តែងដោយតួអង្គសិល្បករជើងចាស់ល្បីៗដូចជាលោកទេពវិនណារ៉ូ លោកពូព្រហ្មម៉ាញ និងអ្នកមីងគ្រត ចំនែកឯសិល្បករជំនាន់ថ្មីមានដូចជាកញ្ញាគីញ វិច្ឆិកា លោកទ្រីតារាវុធ ពុធ មិថុនា  និងយន សុភ័ក្រ។ 

លោកមេសាបានផ្តល់បទសំភាសន៍មកកាន់ រេត អ៊ីនធឺធែនមែន ថា៖

សំរាប់រឿងនេះនិយាយទៅល្អមើលខ្លាំង គុណភាពកុនខ្មែរដែលយើងចង់បានក្នុងកំរិតប៉ិនហ្នឹងឡូយ សរសើរមែនទែនដែលពូឆាយបូរ៉ាគាត់គឺជាផលិតករ គាត់បញ្ចូលរសជាតិទៅក្នុងរឿងហ្នឹងច្រើនមែនទែន ជាពិសេសវារាងមានគ្រប់រសជាតិ ទាំងសប្បាយ កំសត់ ហើយស្នេហាដែរដូចនៅក្នុងរឿងហ្នឹង ហើយនិយាយទៅអត់ខកបំណងទេ អាចមើលលក្ខណៈគ្រួសារក៏បាន រឺក៏មកជាមិត្តភក្តិជុំគ្នាក៏បាន Remind យើងពីក្នុងជីវិតយើងមែនទែន ជាពិសេសសិស្សវិទ្យាល័យក៏គួរតែមកមើលរឿងហ្នឹងដែរ។ប្លង់ដែលខ្ញុំShockជាងគេគឺប្លង់នៅក្នុងពេលដែលលោកគ្រូព្រហ្មម៉ាញគាត់មានសិស្សអមហើយ ធ្វើអោយខ្ញុំShockសឹងថាព្យាយាមទប់អារម្មណ៍ដែរ ប៉ុន្តែទប់អារម្មណ៍មិនបាន ទឹកភ្នែក ប៉ុន្តែមានរឿងសប្បាយច្រើននៅក្នុងហ្នឹងដែលធ្វើអោយយើងមានអារម្មណ៍ថាអត់ស្តាយនឹងចំណាយលុយទិញសំបុត្រមើលរឿងខ្មែរមួយនេះ។

ចំនែកទស្សនិកមួយរូបទៀតមានឈ្មោះថាលីមេង ដែលមានអាជីពជាអ្នកធ្វើការងារក្រុមហ៊ុនបានបង្ហាញចំណាប់ថា៖

ខ្ញុំមានអារម្មណ៍ Mix ជាច្រើនក្នុងរឿងហ្នឹង ព្រោះវាល្អមើល វាមានភាពកំប្លែងនៅក្នុងរឿងហ្នឹង យើងមើលទៅអត់ធុញ ហើយមានអារម្មណ៍ថាស្រស់ស្រាយ ហើយមានការសើចលេងច្រើន ហើយទី២ គឺអារម្មណ៍បែបកំសត់ ឃើញថាយើងមើលទៅយើងនឹកឃើញសម័យកាលយើងរៀនវិទ្យាល័យ ធ្លាប់មានបទពិសោធន៍នៅវិទ្យាល័យម៉េច ស្រលាញ់គ្រូយ៉ាងម៉េច មានបទពិសោធន៍ជាមួយគ្រូ វាreflect ទៅការជាគ្រូបង្រៀន តើគាត់មានអារម្មណ៍បែបណាពេលគាត់បង្រៀនសិស្ស ហើយសិស្សមានការរៀនទៅល្អ និងការរៀនទៅមិនល្អបែបណាខ្លះ និយាយទៅរឿងហ្នឹងមាន Mix Feeling ទាំងអស់​​​ ទាំងសេធ ទាំងសប្បាយចិត្ត ទាំងSurprise ទាំងកំប្លែង មានចូលក្នុងហ្នឹងទាំងអស់។​​​ ខ្ញុំ Recommend ព្រោះនេះជារឿងរបស់ខ្មែរយើង ខ្ញុំកោតសរសើរនៃការផលិតរឿងមួយនេះ គឺមានការលើកដាក់ខ្ពស់ ហើយសមិទ្ធផលឃើញថាល្អ ។

គួរបញ្ជាក់ផងដែរថាខ្សែភាពយន្តក្រោមចំណងជើងថា«លោកគ្រូប្រពន្ធល្អ»នេះនឹងត្រូវចាក់បញ្ចាំងជាផ្លូវការនៅក្នុងថ្ងៃទី៥ ខែតុលានេះតទៅនៅតាមបណ្តារោងភាពយន្តនានា។ ដូចនេះទស្សនិកជនដែលចូលចិត្តទស្សនាសាច់រឿងបែបកំប្លែង មនោសញ្ចេតនា បែបលក្ខណៈជាជីវិតគ្រួសារពិតៗរបស់គ្រូបង្រៀន និងជីវភាពរស់នៅពិតៗ អាចជាវសំបុត្រដើម្បីទស្សនាបាន។