ភ្នំពេញ៖ ផ្លូវល្បឿនលឿនភ្នំពេញ-ព្រះសីហនុ នឹងបើកឱ្យយានយន្តចាប់ផ្ដើមធ្វើចរាចរណ៍ចេញ-ចូលសាកល្បងដោយឥតគិតថ្លៃរយៈពេល១ខែចាប់ពីថ្ងៃទី១ ខែតុលា ឆ្នាំ២០២២ស្អែកនេះតទៅ។ គម្រោងផ្លូវល្បឿនលឿននេះត្រូវបានអនុញ្ញាតឱ្យអ្នកដំណើរឆ្លងកាត់ចេញចូលបានតាមច្រកចំនួន៨រួមមាន៖
ច្រកទី១ភ្នំពេញ(ផ្លូវកប់ស្រូវ)គីឡូម៉ែត្រ៣, ច្រកទី២កំពង់ស្ពឺកើតគីឡូម៉ែត្រ២៦, ច្រកទី៣កំពង់ស្ពឺលិចគីឡូម៉ែត្រ៤៣, ច្រកទី៤ត្រែងត្រយឹងគីឡូម៉ែត្រ៧៦, ច្រកទី៥កំពង់សិលា គីឡូម៉ែត្រ១១៤, ច្រកទី៦ស្រែអំបិលគីឡូម៉ែត្រ១៣៥, ច្រកទី៧ស្ទឹងហាវគីឡូម៉ែត្រ១៧២ និងច្រកទី៨ព្រះសីហនុគីឡូម៉ែត្រ១៨២។
លោកទេសរដ្ឋមន្រ្តី ស៊ុន ចាន់ថុល រដ្ឋមន្ត្រីក្រសួងសាធារណការនិងដឹកជញ្ជូនបានប្រាប់អ្នកសារព័ត៌មានថា គម្រោងការងារសាងសង់ផ្លូវល្បឿនលឿនបានអនុវត្តលឿនជាងផែនការគ្រោងទុករហូតដល់ទៅ៨ខែនិងបានណែនាំដល់ប្រជាពលរដ្ឋគួរយល់ដឹងពីការប្រើប្រាស់ផ្លូវល្បឿនលឿនថ្មីនិងដំបូងគេបង្អស់របស់កម្ពុជាប្រកបដោយភាពត្រឹមត្រូវតាមបទដ្ឋានសុវត្ថិភាពចរាចរណ៍។
សូមជម្រាបថា ផ្លូវល្បឿនលឿនពីភ្នំពេញទៅកាន់ទៅខេត្តព្រះសីហនុមានប្រវែងសរុប១៨៧,០៥គីឡូម៉ែត្រត្រូវបានបើកការដ្ឋានសាងសង់ក្រោមអធិបតីភាពសម្តេចតេជោ ហ៊ុន សែន នាយករដ្ឋមន្ត្រីកម្ពុជាកាលពីថ្ងៃទី២២ ខែមីនា ឆ្នាំ២០១៩៕
