ភ្នំពេញ៖ សម្ដេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃបានរំលឹកដល់ថ្នាក់ដឹកនាំនិងមន្ត្រីពាក់ព័ន្ធដែលស្ថិតក្រោមសមត្ថកិច្ចក្រសួងមហាផ្ទៃទាំងអស់ ឱ្យបន្តខិតខំពន្លឿនការដោះស្រាយករណីដែលនៅសេសសល់ជូនប្រជាពលរដ្ឋ។
យោងតាមសំណេរនៅក្នុងផេកផ្លូវការរបស់សម្ដេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃបានឱ្យដឹងនៅថ្ងៃទី២៩ ខែកញ្ញា ឆ្នាំ២០២២នេះថា ការដោះស្រាយករណីទាំងអស់ត្រូវតែដោះស្រាយឱ្យបានល្អគ្រប់ជ្រុងជ្រោយចំបញ្ហានិងចប់ចុងចប់ដើមដោយមិនគ្រាន់តែធ្វើជាលិខិតស្នាមបញ្ជាតាមបែបបទរដ្ឋបាល។
តាមរបាយការណ៍របស់ក្រុមការងារតាមដានអំពីការដោះស្រាយចំពោះមតិយោបល់ ឬសំណូមពររបស់ប្រជាពលរដ្ឋនៅក្នុងទំព័រហ្វេសប៊ុកសម្ដេចក្រឡាហោម ស ខេង បានឱ្យដឹងថា នៅក្នុងខែសីហាឆ្នាំ២០២២នេះក្រុមការងារនេះបានទទួលសំណូមពរនិងសំណួររបស់ប្រជាពលរដ្ឋស្ថិតក្នុងដែនសមត្ថកិច្ចក្រសួងមហាផ្ទៃចំនួន១៥៧គណនី។
របាយការណ៍បានឱ្យដឹងបន្តថា ក្រុមការងារបានឆ្លើយតបទៅម្ចាស់គណនីនិងដោះស្រាយចំនួន១០គណនីហើយបូករួមទាំងករណីសេសសល់កាលពីខែមុនៗ និងក្នុងខែសីហា គឺនៅមានករណីចំនួន៣១៣ទៀតកំពុងស្ថិតក្នុងការដោះស្រាយតាមនីតិវិធី។
របាយការណ៍ដដែលនេះបានបញ្ជាក់ដែរថា នៅមានសំណូមពរសំណួរនិងបញ្ហាខ្លះទៀតត្រូវបានក្រុមការងាររកឃើញថាខុសពីសមត្ថកិច្ចក្រសួងមហាផ្ទៃ ប៉ុន្តែត្រូវបានជូនយោបល់ដោយបង្វែរទៅស្ថាប័នមានសមត្ថកិច្ច៕
