ភ្នំពេញ៖ តំបន់ភាគឦសានប្រទេសកម្ពុជាអាចប្រឈមនឹងទឹកជំនន់ខណៈស្ថានភាពអាកាសធាតុកំពុងមានការប្រែប្រួលដោយសារឥទ្ធិពលព្យុះទី១៦ឈ្មោះ ណូរុ "NORU"។នេះបើយោងតាមសេចក្តីជូនដំណឹងរបស់ក្រសួងធនធានទឹកនិងឧតុនិយម។ នៅក្នុងសេចក្តីជូនដំណឹងនាព្រឹកថ្ងៃទី២៩ ខែកញ្ញា ឆ្នាំ២០២២ បានឱ្យដឹងថា ឥទ្ធិពលព្យុះទី១៦ ឈ្មោះ ណូរុ "NORU" បានធ្វើឱ្យស្ថានភាពអាកាសធាតុមានការប្រែប្រួលមកលើអាងទន្លេមេគង្គក្នុងប្រទេសថៃ ឡាវ វៀតណាម និងកម្ពុជា ដែលធ្វើឲ្យមានភ្លៀងធ្លាក់ច្រើន។

ក្រសួងធនធានទឹកនិងឧតុនិយមបានឱ្យដឹងបន្តថា ទឹកទន្លេមេគង្គនឹងហក់ឡើងក្នុងរយៈពេលពី៣ទៅ៥ថ្ងៃខាងមុខជាពិសេសនៅភាគខាងលើនៃប្រទេសកម្ពុជាមានខេត្តស្ទឹងត្រែងទឹកនឹងអាចឡើងដល់កម្ពស់១០,០០ ម៉ែត្រ, ខេត្តក្រចេះ ទឹកនឹងអាចឡើងដល់កម្ពស់២១,០០ម៉ែត្រ និងខេត្តកំពង់ចាមទឹកនឹងអាចឡើងដល់កម្ពស់១៤,៣០ម៉ែត្រ។ រីឯនៅស្ថានីយជលសាស្ត្រភ្នំពេញ-ចតុមុខទឹកអាចឡើងដល់កម្ពស់៩,៤០ម៉ែត្រ ។

យ៉ាងណាក៏ដោយទឹកទន្លេដែលហក់ឡើងនាពេលនេះនៅមិនទាន់ដល់កម្រិតឲ្យមានការប្រុងប្រយ័ត្ននៅឡើយទេតែទឹកអាចនឹងហូរចូលលិចតំបន់ទំនាបមួយចំនួនអមតាមដងទន្លេ និងបន្តហូរចូលតាមបណ្តាព្រែកបន្ថែមទៀត។ ក្រសួងបានបញ្ជាក់បន្ថែមថា នៅតំបន់ភាគឦសានទឹកទន្លេសេកុងកំពុងហក់ឡើងដែលអាចប្រឈមនឹងទឹកជំនន់ផងដែរ៕