ភ្នំពេញ៖ បម្រាមមួយចំនួនពាក់ព័ន្ធករណីជំងឺកូវីដ-១៩ អាចនឹងត្រូវដកចេញបន្ថែមទៀត ដើម្បីសម្រួលដល់ការចេញចូលរបស់អ្នកដំណើរខណៈរាជរដ្ឋាភិបាលកម្ពុជាប្ដេជ្ញាខិតខំស្ដារសេដ្ឋកិច្ចឱ្យបានប្រសើរឡើងវិញ។

សម្តេចតេជោ ហ៊ុន សែន នាយករដ្ឋមន្រ្តីកម្ពុជាបានមានប្រសាសន៍ក្នុង "វេទិកាជាតិអន្តរសាសនាប្រឆាំងការជួញដូរមនុស្សលើកទី៦" នាព្រឹកថ្ងៃទី២៩ ខែកញ្ញា ឆ្នាំ២០២២នេះថា ករណីភ្ជាប់កាតវ៉ាក់សាំងនិងការបញ្ជាក់វិញ្ញាបនបត្រសុខភាពគួរត្រូវបានលើកលែង។ សម្តេចតេជោនាយករដ្ឋមន្រ្តីកម្ពុជាបានលើកឡើងថា កាលសម្ដេចចូលរួមកិច្ចប្រជុំនៅអង្គការសហប្រជាជាតិក្នុងសហរដ្ឋអាមេរិកគេពុំបានសួររកកាតចាក់វ៉ាក់សាំងជំងឺកូវីដ-១៩នោះឡើយហើយក៏មិនមែនដោយសារតែជាភ្ញៀវ VIP ដែរ។

នៅក្នុងពិធីនេះសម្តេចតេជោបានប្រាប់ទៅលោក ម៉ម ប៊ុនហេង រដ្ឋមន្រ្តីក្រសួងសុខាភិបាលឱ្យប្រជុំពិនិត្យមើលអំពីលទ្ធភាពដកចេញនិងបន្ធូរបន្ធយបន្ថែមទៀតករណីការប្រើប្រាស់កាតវ៉ាក់សាំងនិងការបញ្ជាក់វិញ្ញាបនបត្រសុខភាពចំពោះអ្នក​ដំណើរចូលមកកម្ពុជា។ យ៉ាងណាក៏ដោយសម្តេចតេជោ ហ៊ុន សែន នាយករដ្ឋមន្រ្តីកម្ពុជាបានលើកទឹកចិត្តដល់ពលរដ្ឋឱ្យបន្តចូលរួមចាក់វ៉ាក់សាំងការពារជំងឺកូវីដ-១៩និងអនុវត្តតាមវិធានការរបស់ក្រសួងសុខាភិបាលខណៈជំងឺកូវីដ-១៩មិនទាន់ចប់នៅឡើយទេ។

របាយការណ៍របស់ក្រសួងសុខាភិបាលបានឱ្យដឹងថា គិតត្រឹមថ្ងៃទី២៨ ខែកញ្ញា ឆ្នាំ២០២២ មានពលរដ្ឋចំនួន៩៤,៩៦ភាគរយនៃចំនួនប្រជាជនសរុប១៦លាននាក់បានទទួលវ៉ាក់សាំងកូវីដ-១៩៕