ភ្នំពេញ៖ ជនបរទេសចំនួន៦៦នាក់ ដែលចូលមកកម្ពុជាដោយខុសច្បាប់ត្រូវបានអគ្គនាយកដ្ឋានអន្តោប្រវេសន៍ឃាត់ខ្លួននិងទើបបណ្ដេញចេញដោយអនុលោមតាមច្បាប់ស្ដីពី អន្តោប្រវេសន៍។
សេចក្ដីប្រកាសព័ត៌មានរបស់អ្នកនាំពាក្យអគ្គនាយកដ្ឋានអន្តោប្រវេសន៍បានឱ្យដឹងថា កាលពីថ្ងៃទី២៧-២៨ ខែកញ្ញា ឆ្នាំ២០២២ អគ្គនាយកដ្ឋានអន្តោប្រវេសន៍បានធ្វើការបណ្ដេញជនបរទេសចំនួន៦៦នាក់ ស្រី២៥នាក់ មាន៣សញ្ជាតិ ក្នុងនោះជនជាតិថៃចំនួន៦៤នាក់ ស្រី២៥នាក់ ជនជាតិឥណ្ឌាចំនួន១នាក់ ភេទប្រុស និងជនជាតិនីហ្សេរីយ៉ា ចំនួន០១នាក់ ភេទប្រុស ចេញពីព្រះរាជាណាចក្រកម្ពុជាអនុលោមតាមច្បាប់ស្ដីពីអន្តោប្រវេសន៍តាមប៉ុស្តិ៍នគរបាលច្រកទ្វារអាកាសយានដ្ឋានអន្តរជាតិភ្នំពេញនិងច្រកទ្វារព្រំដែនអន្តរជាតិប៉ោយប៉ែត។
អ្នកនាំពាក្យអគ្គនាយកដ្ឋានអន្តោប្រវេសន៍បានឱ្យដឹងបន្ថែមថា ជនបរទេសទាំង៦៦នាក់ត្រូវបានសមត្ថកិច្ចធ្វើការឃាត់ខ្លួនពាក់ព័ន្ធបទល្មើសលួចឆ្លងដែនខុសច្បាប់គ្មានលិខិតឆ្លងដែនលួចស្នាក់នៅខុសច្បាប់លើសទិដ្ឋាការកំណត់ និងប្រើប្រាស់លិខិតឆ្លងដែនមិនប្រក្រតីដែលល្មើសនិងច្បាប់ស្ដីពីអន្តោប្រវេសន៍ដោយត្រូវធ្វើការបណ្ដេញចេញតាមប្រកាសក្រសួងមហាផ្ទៃនិងហាមឃាត់ការចូលប្រទេសកម្ពុជារយៈពេល៣ឆ្នាំ។
សូមបញ្ជាក់ដែរថា កាលពីថ្ងៃទី២៣ ខែកញ្ញា ឆ្នាំ២០២២ អគ្គនាយដ្ឋានអន្តោប្រវេសន៍ទើបបណ្ដេញជនបរទេសចំនួន២៣០នាក់ ស្រី៥០នាក់ មានសញ្ជាតិ៖ ជនជាតិវៀតណាម ២២៨នាក់ និងជនជាតិចិនចំនួន២នាក់ ចេញពីកម្ពុជាដោយសារលួចស្នាក់នៅខុសច្បាប់គ្មានលិខិតឆ្លងដែនលើសទិដ្ឋាការកំណត់និងប្រើប្រាស់ទិដ្ឋាការខុសគោលដៅដែលល្មើសនិងច្បាប់ស្ដីពីអន្តោប្រវេសន៍៕
