ភ្នំពេញ៖ អនុប្រធានទី១គណៈកម្មាធិការជាតិគ្រប់គ្រងគ្រោះមហន្តរាយបានដាស់តឿនដល់អាជ្ញាធរពាក់ព័ន្ធប្រចាំការ២៤ម៉ោងលើ២៤ម៉ោង ក្នុងការចេញជួយប្រជាពលរដ្ឋ ដែលប្រឈមការជន់លិចដោយសារជំនន់ទឹកភ្លៀង។ ការដាស់តឿននេះបានធ្វើឡើងខណៈនៅតាមបណ្តាតំបន់មួយចំនួនក្នុងប្រទេសកម្ពុជាកំពុងប្រឈមការជន់លិច ដោយសារជំនន់ទឹកភ្លៀង។
លោកទេសរដ្ឋមន្ត្រី គន់ គីម អនុប្រធានទី១គណៈកម្មាធិការជាតិគ្រប់គ្រងគ្រោះមហន្តរាយបានអំពាវនាវដល់លេខាធិការគ្រប់គ្រងគ្រោះមន្តរាយខេត្តជាពិសេសនៅគ្រប់ខេត្តប្រឈមការជន់លិចទាំងអស់ត្រូវត្រៀមលក្ខណៈសម្បត្តិជាប់ជាប្រចាំនិង២៤ម៉ោងលើ២៤ម៉ោង ក្នុងការចេញជួយប្រជាពលរដ្ឋនឹងមិនត្រូវឱ្យពលរដ្ឋណាម្នាក់រងគ្រោះថ្នាក់ដោយអាជ្ញាធរមិនបានដឹងនោះឡើយ។
លោកទេសរដ្ឋមន្ត្រី គន់ គីម ក៏បានអំពាវនាវដល់ប្រជាពលរដ្ឋនៅតាមតំបន់ប្រឈមការជន់លិចឱ្យត្រៀមលក្ខណៈសម្បត្តិជម្លៀសទៅកាន់ទីទួលសុវត្ថិភាពនិងលើកដាក់ទ្រព្យសម្បត្តិនៅទីខ្ពស់បញ្ចៀសការលិចលង់។
លោកទេសរដ្ឋមន្ត្រីក៏បានណែនាំដល់ប្រជាពលរដ្ឋប្រញាប់ទាក់ទងទៅអាជ្ញាធរជាបន្ទាន់នៅពេលផ្ទះសម្បែងខ្លួនរងការគំរាមពីជំនន់ទឹកភ្លៀងជាពិសេសត្រូវប្រយ័ត្នប្រយែងកូនចៅតូចៗមិនឱ្យលេងទឹកអាចប្រឈមនឹងគ្រោះថ្នាក់លង់ទឹក៕
