ភ្នំពេញ៖ មន្ត្រីនគរបាលចំនួន៣រូបនៃអគ្គលេខាធិការដ្ឋានក្រុមប្រឹក្សាកីឡា ក្រសួងមហាផ្ទៃ ត្រូវបានសម្តេចតេជោ ហ៊ុន សែន នាយករដ្ឋមន្រ្តីកម្ពុជាចេញអនុក្រឹត្យបញ្ចប់មុខតំណែងនិងបន្ថយឋានន្តរស័ក្តិ។

នៅក្នុងអនុក្រឹត្យស្តីពីការអនុវត្តវិន័យមន្រ្តីនគរបាលជាតិ ដែលចុះហត្ថលេខាដោយសម្តេចតេជោ ហ៊ុន សែន នាយករដ្ឋមន្រ្តីកម្ពុជាកាលពីថ្ងៃទី១៣ ខែកញ្ញា ឆ្នាំ២០២២ បានឱ្យដឹងថា មន្ត្រីនគរបាលទាំង៣រូបនៃអគ្គលេខាធិការដ្ឋានក្រុមប្រឹក្សាកីឡាក្រសួងមហាផ្ទៃដែលបានបញ្ចប់មុខតំណែងរួមមាន៖

១-ឧត្តមសេនីយ៍ត្រី ជា ប៊ុនវិបុល អត្តលេខ ៧៩៨០០ ពីអគ្គលេខាធិការរង ឱ្យមកជាមន្ត្រី

២-ឧត្តមសនីយ៍ត្រី ជា សែនវិស្សុត អត្តលេខ ៧៩៨០២ ពីអគ្គលេខាធិការរង ឱ្យមកជាមន្ត្រី

៣-វរសេនីយ៍ឯក ជា ច័ន្ទវិចិត្រ អត្តលេខ ៨៤៤៤៨ ពីប្រធានអង្គភាពរដ្ឋបាល និងហិរញ្ញវត្ថុ មានឋានៈស្មើ ប្រធាននាយកដ្ឋាន ឱ្យមកជាមន្ត្រី។

នៅក្នុងមាត្រា២នៃសេចក្តីសម្រេចក៏បានបន្ថយឋានន្តរស័ក្តិវរសេនីយ៍ឯក ជា ច័ន្ទវិចិត្រ អត្តលេខ ៨៤៤៤៨ ចំនួន២ថា្នក់មកនៅត្រឹមថ្នាក់វរសេនីយ៍ត្រីផងដែរ។ នៅក្នុងអនុក្រឹត្យ ស្តីពីការអនុវត្តវិន័យមន្រ្តីនគរបាលជាតិនេះពុំបានបង្ហាញពីមូលហេតុនៃការបញ្ចប់មុខតំណែងនោះទេ ប៉ុន្តែនៅក្នុងមាត្រា៣ បានលើកឡើងថា បទប្បញ្ញត្តិទាំងឡាយណាដែលផ្ទុយនឹងអនុក្រឹត្យនេះត្រូវទុកជានិរាករណ៍ ៕