ភ្នំពេញ៖ ក្រសួងទេសចរណ៍បានឱ្យដឹងថា នាថ្ងៃចុងសប្តាហ៍ទី១៧-១៨ ខែកញ្ញា ឆ្នាំ២០២២ នៅទូទាំងប្រទេសទទួលបានភ្ញៀវសរុបចំនួន៣០០,៣៨៥នាក់ក្នុងនោះភ្ញៀវជាតិ ២៤៦,៩៦០នាក់ និងភ្ញៀវបរទេសផ្ទៃក្នុងចំនួន៥៣,៤២៥នាក់។

របាយការណ៍របស់ក្រសួងទេសចរណ៍បានឱ្យដឹងបន្ថែមថា គោលដៅទេសចរណ៍សំខាន់ៗរួមមាន៖រាជធានីភ្នំពេញ៦៩,៤០៤នាក់, ខេត្តព្រះសីហនុ ២៩,៤២២នាក់, ខេត្តកណ្តាល២៥,០៩៣នាក់, ខេត្តសៀមរាប២៤,៥៧៧នាក់, ខេត្តកំពត២២,៥៥៥នាក់, ខេត្តបាត់ដំបង២០,១៩០នាក់, ខេត្តកំពង់ចាម១៩,៩៤៩នាក់, ខេត្តកំពង់ស្ពឺ ១៣,២៩៨នាក់, ខេត្តកែប១២,៥១៩នាក់ និងខេត្តពោធិ៍សាត់ចំនួន១២,០៣៧នាក់។

ក្រសួងទេសចរណ៍បានបញ្ចាក់ថា តួលេខខាងលើមានការកើនឡើងប្រមាណ៤៧.៣ភាគរយធៀបនឹងសប្តាហ៍កន្លងមក។ សូមបញ្ជាក់ថា ក្រសួងទេសចរណ៍បានដាក់ចេញសារាចរណែនាំមួយកាលពីថ្ងៃទី១៣ ខែកញ្ញា ឆ្នាំ២០២២ ដល់មន្ទីរទេសចរណ៍ និងផ្នែកពាក់ព័ន្ធដើម្បីបន្តពង្រឹងការអនុវត្តវិធានសុវត្ថិភាពនិង SOP ទប់ស្កាត់ការរីករាលដាលជំងឺកូវីដ-១៩ ការពង្រឹងគុណភាពសេវាកម្មទេសចរណ៍រក្សាតម្លៃសមរម្យ បរិស្ថានអនាម័យ និងបញ្ជៀសការជួបជុំកកកុញខ្លាំងនៅតាមគោលដៅទេសចរណ៍នានាដូចដែលធ្លាប់កើតមាននាឆ្នាំកន្លងមក៕