ភ្នំពេញ៖ សាធាររដ្ឋប្រជាមានិតចិនបានប្រគល់ជំនួយឥតសំណងជាសម្ភារយោធាដល់ក្រសួងការពារជាតិកម្ពុជានៅមជ្ឈមណ្ឌលហ្វឹកហ្វឺន កងរាជអាវុធហត្ថភ្នំជុំរីករាយស្រុកសាមគ្គីមានជ័យ ខេត្តកំពង់ឆ្នាំង ក្រោមវត្តមានសម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងលោក វ៉ាង វិនធាន ឯកអគ្គរដ្ឋទូតចិនប្រចាំកម្ពុជា។

ថ្លែងក្នុងពិធីដែលបានធ្វើឡើងនាព្រឹកថ្ងៃទី២០ ខែកញ្ញា ឆ្នាំ២០២២ នេះសម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិបានមានប្រសាសន៍ថា ជំនួយសម្ភារយោធា ដែលសាធាររដ្ឋប្រជាមានិតចិនបានផ្តល់មកឱ្យកម្ពុជាគឺជាការរួមចំណែកយ៉ាងសំខាន់ក្នុងការការពារសន្តិភាព ស្ថេរភាពនយោបាយ សន្តិសុខសណ្តាប់ធ្នាប់សង្គម និងទប់ស្កាត់រាល់ការប៉ុនប៉ងបង្កចលាចលរបស់ក្រុមជ្រុលនិយមមួយចំនួន។

រដ្ឋមន្ត្រីក្រសួងការពារជាតិបានចាត់ទុកជំនួយឧបត្ថម្ភរបស់ចិនបានឆ្លុះបញ្ចាំងឱ្យឃើញពីស្មារតីមិត្តភាព សាមគ្គីភាព និងជាមិត្តដែកថែបដ៏ពិតប្រាកដដែលតែងតែជួយគាំទ្រកងទ័ពនៅគ្រាមានទុក្ខលំបាកបានទាន់ពេលវេលានិងគ្មានលក្ខណ។ ជាមួយគ្នានេះសម្តេចពិជ័យសេនា ទៀ បាញ់ បានបញ្ជាក់ពីភាពម៉ឺងម៉ាត់នូវគោលជំហររបស់ក្រសួងការពារជាតិគាំទ្រចំពោះនយោបាយចិនតែមួយ និងចក្ខុវិស័យសហគមន៍វាសនារួមរវាងចិននិងកម្ពុជា ។

លោក វ៉ាង វិនធាន ឯកអគ្គរដ្ឋទូតចិនប្រចាំកម្ពុជាបានថ្លែងថា កិច្ចសហប្រតិបត្តិការយោធាចិនកម្ពុជាជាផ្នែកសំខាន់នៃការកសាងសហគមន៍រវាងប្រទេសទាំងពីរ។ លោកបន្តថា កងទ័ពទាំងពីរបានរក្សាជានិច្ចនូវការទុកចិត្តគ្នាប្រកបដោយផ្លែផ្កាលើច្រើនវិស័យ។

លោកបានចាត់ទុកជំនួយយោធាលើកនេះថា ជាការចាំបាច់ចំពោះកងយោធពលខេមរៈភូមិន្ទកម្ពុជាហើយចិនរីករាយក្នុងការលើកកម្ពស់វិស័យយោធាដើម្បីគាំពារផលប្រយោជន៍រួមរវាងប្រទេសទាំងពីរ៕