ភ្នំពេញ៖ ជនសង្ស័យជាមុខសញ្ញាឆក់ទ្រព្បសម្បត្តិម្នាក់ ត្រូវបានសមត្ថកិច្ច នគរបាល រាជធានីភ្នំពេញធ្វើការឃាត់ខ្លួន ក្រោយពេលធ្វើសកម្មភាពឆក់យកកាបូបក្រវ៉ាត់ចង្កេះ ប្រព្រឹត្តនៅចំណុចមុខផ្ទះលេខ២១២ ស្ថិតនៅផ្លូវលេខ២១៧ ក្រុម៥២ ភូមិ១៧ សង្កាត់បឹងសាឡាង ខណ្ឌទួលគោក កាលពីថ្ងៃទី១២ ខែកញ្ញា ឆ្នាំ២០២២កន្លងទៅ។
នគរបាល រាជធានីភ្នំពេញបានឱ្យដឹងថា ជនសង្ស័យដែលបានឃាត់ខ្លួនមានឈ្មោះ សន វិសាល ហៅហុង ជនជាតិខ្មែរ មុខរបរ សិស្ស ស្នាក់នៅក្នុងសង្កាត់បឹងសាឡាង ខណ្ឌទួលគោក រាជធានីភ្នំពេញ។
ចំណែកជនរងគ្រោះមានឈ្មោះ វៃ ស្រីណែត ភេទស្រី អាយុ២៧ ឆ្នាំ ជនជាតិខ្មែរ មុខរបរ លក់ដូរ ស្នាក់នៅក្នុងសង្កាត់ដង្កោ ខណ្ឌដង្កោ រាជធានីភ្នំពេញ និងបាត់បង់កាបូបក្រវ៉ាត់ចង្កេះ ចំនួន១, ប្រាក់ដុល្លារចំនួន៨០០ ដុល្លារអាមេរិក, ប្រាក់រៀលចំនួន ២៩០,០០០រៀល និងទូរសព្ទ័ដៃ១គ្រឿង។
បច្ចុប្បន្នជនសង្ស័យនិងវត្ថុតាង ត្រូវបានកម្លាំងជំនាញការិយាល័យ កសាងសំណុំរឿងបញ្ជូនទៅសាលាដំបូងរាជធានីភ្នំពេញ ដើម្បីចាត់ការបន្តតាមនីតិវិធីច្បាប់៕
