ភ្នំពេញ៖ ស្ថានឯកអគ្គរាជទូតកម្ពុជា ប្រចាំនៅប្រទេសជប៉ុន បានអំពាវនាវដល់ពលរដ្ឋខ្មែរដែលរស់នៅ និងធ្វើការក្នុងប្រទេសជប៉ុនត្រូវមានការប្រុងប្រយ័ត្នខ្ពស់ ខណៈប្រទេសជប៉ុន អាចនឹងប្រឈមហានិភ័យ នៃព្យុះទីហ្វុង។

យោងតាមការអំពាវនាវរបស់ស្ថានឯកអគ្គរាជទូតកម្ពុជាបានឱ្យដឹងនៅព្រឹកថ្ងៃទី១៨ ខែកញ្ញា ឆ្នាំ២០២២នេះថា ទីភ្នាក់ងារឧតុនិយមជប៉ុន បានចេញសេចក្តីព្រមានអំពីហានិភ័យកម្រិតខ្ពស់ ដែលអាចកើតឡើងដោយព្យុះទីហ្វុង Nanmadol នៅខេត្ត Kagoshima នៃភាគខាងលិចឈាងខាងត្បូង ប្រទេសជប៉ុន ។ 

ស្ថានឯកអគ្គរាជទូតកម្ពុជា បានស្រង់ខ្លឹមសាររបស់ទីភ្នាក់ងារឧតុនិយមខាងលើថា ព្យុះដ៏មានឥទ្ធិពលនេះ អាចបង្កឱ្យមានខ្យល់បក់បោក រលកព្យុះ និងការបាក់ដី ឬអាចនឹងរំកិលមកជិតខេត្ត Kagoshima នៅថ្ងៃអាទិត្យនេះ ហើយខេត្ត Kagoshima អាចនឹងរងផលប៉ះពាល់ដោយគ្រោះមហន្តរាយទ្រង់ទ្រាយធំ ដែលមិនធ្លាប់មានពីមុន។

ជាមួយគ្នានេះ ស្ថានឯកអគ្គរាជទូតកម្ពុជា ប្រចាំនៅប្រទេសជប៉ុន បានណែនាំដល់ប្រជាពលរដ្ឋខ្មែរ ដែលកំពុងរស់នៅតំបន់ខាងលើ ឱ្យមានការប្រុងប្រយ័ត្នខ្ពស់ ហើយក្នុងករណីរងផលប៉ះពាល់ ត្រូវជូនដំណឹងបន្ទាន់មកស្ថានទូតដើម្បីជួយអន្តរាគមន៍៕