ភ្នំពេញ៖ សម្តេចតេជោ ហ៊ុន សែន នាយករដ្ឋមន្រ្តីកម្ពុជា បានចេញបទបញ្ជាយ៉ាងម៉ឺងម៉ាត់ឱ្យអាជ្ញាធរ ត្រូវបង្រ្កាបល្បែងស៊ីសងខុសច្បាប់ ដូចភ្លៀងរលឹម និងព្រមាន ដកហូតមុខតំណែង ប្រសិនបើមិនអនុវត្តតួនាទី។

ការចេញបទបញ្ជានេះ បានធ្វើឡើងនៅក្នុងសារសំឡេងពិសេសមួយ នាព្រឹកថ្ងៃទី១៧ ខែកញ្ញា ឆ្នាំ២០២២នេះ។

នៅក្នុងសារសំឡេង សម្តេចតេជោ ហ៊ុន សែន នាយករដ្ឋមន្រ្តីកម្ពុជា បានមានប្រសាសន៍លើកឡើងថា ទីតាំងបនល្បែងនៅតាមហាងគុយទាវ និងហាងកាហ្វេ ព្រមទាំងទីតាំងសុខច្បាប់ដទៃទៀត ចាំបាច់ត្រូវតែបិទចោល។

សម្តេចតេជោ បានថ្លែងបន្តថា បទបញ្ជាឱ្យធ្វើឡើងដើម្បីការពារសេចក្តីសុខប្រជាពលរដ្ឋ ពីការបំផ្លាញដោយសារល្បែង និងដើម្បីកុំឱ្យមានចោរលួច ចោរប្លន់ ដោយសារចាញ់ល្បែង។

ជាមួយគ្នានេះ សម្តេចតេជោ នាយករដ្ឋមន្រ្តីកម្ពុជា បានបញ្ជាក់ថា សម្តេចមិនញញើតក្នុងការដកចោលពីមុខតំណែងចំពោះមន្រ្តី ដែលមិនអនុវត្តនូវតួនាទីនោះឡើយ ហើយសម្តេច គិតថា កន្លែងលេងល្បែងមួយចំនួន មិនមែនមន្រ្តីមូលដ្ឋានមិនដឹងនោះទេ ប៉ុន្តែបញ្ហាស្ថិតនៅត្រង់ថា មានឆន្ទះធ្វើ ឬមិនធ្វើប៉ុណ្ណោះ។

សូមបញ្ជាក់ថា សម្តេចតេជោ ហ៊ុន សែន នាយករដ្ឋមន្រ្តីកម្ពុជា ទើបសម្រេចចាត់តាំងលោក សុខ ផល រដ្ឋលេខាធិការ ក្រសួងមហាផ្ទៃ ធ្វើជាប្រធានក្រុមការងារ បង្ក្រាបការលេងល្បែងស៊ីសងខុសច្បាប់គ្រប់ប្រភេទ។

ក្រុមការងារបង្ក្រាបការលេងល្បែងស៊ីសងខុសច្បាប់គ្រប់ប្រភេទ មានតួនាទីភារកិច្ច រៀបចំផែនការ វិធានការ គោលការណ៍ណែនាំ ដើម្បីឱ្យអាជ្ញាធរមានសមត្ថកិច្ចគ្រប់លំដាប់ថ្នាក់អនុវត្តបង្ក្រាបនូវរាល់ការលេងល្បែងស៊ីសងខុសច្បាប់គ្រប់ប្រភេទ៕

អត្ថបទ៖លាង ឡា