ភ្នំពេញ៖ រថភ្លើងដឹកប្រេង១ខ្សែបានបើកធ្លាក់ផ្លូវនៅចំណុចភូមិចែងម៉ែង ស្ថិតក្នុងសង្កាត់សំរោងក្រោមខណ្ឌពោធិ៍សែនជ័យកាលពីវេលាម៉ោង៧ និង៥៥នាទីព្រឹក នាថ្ងៃទី៧ ខែកញ្ញា បង្កការភ្ញាក់ផ្អើលតែត្រូវបានជួយអន្តរាគមន៍បង្ការហានិភ័យទាន់ពេលវេលា។
ប្រភពពីកន្លែងកើតហេតុបានឱ្យដឹងថា នៅមុនពេលកើតហេតុរថភ្លើង១ខ្សែនេះបានធ្វើដំណើរក្នុងទិសដៅពីត្បូងទៅជើងដោយដឹកប្រេង និងទំនិញមកពីខេត្តព្រះសីហនុ ប៉ុន្តែពេលមកដល់ចំណុចកើតហេតុស្រាប់តែផ្លូវស្រុតញែកចេញពីគ្នាបណ្តាលឲ្យកង់រថភ្លើងរត់ខុសផ្លូវក្រឡាប់ស៊ីទែនប្រេងចំនួន២ ប៉ុន្តែពុំបណ្ដាលឲ្យបែកស៊ីទែន ឬកំពប់ប្រេងនោះទេ។
ក្រោយពីមានករណីនេះកើតឡើងគេសង្កេតឃើញអ្នកជំនាញរបស់ក្រុមហ៊ុនហ៊ុនពាក់ព័ន្ធបាននាំគ្នាអន្តរាគមន៍ដោយស្ទូចលើកទូរថភ្លើង និងរៀបចំផ្លូវដែកដែលខូចខាតឡើងវិញ៕
