ភ្នំពេញ៖ ក្រសួងធនធានទឹក និងឧតុនិយមបានអំពាវនាវដល់អ្នករស់នៅក្នុងភូមិសាស្រ្តតំបន់ជួរភ្នំ ទីទំនាប និងជាប់ផ្លូវទឹក ត្រូវបង្កើនការប្រុងប្រយ័ត្នចំពោះជំនន់ទឹកភ្លៀង។ យោងតាមសេចក្តីជូនដំណឹងរបស់ក្រសួងធនធានទឹក និងឧតុនិយមបានឱ្យដឹងនៅព្រឹកថ្ងៃទី៦ ខែកញ្ញា ឆ្នាំ២០២២នេះថា កម្ពុជាទទួលរងប្រព័ន្ធសម្ពាធទាបចាប់ពីថ្ងៃទី៧ ដល់ថ្ងៃទី១៣ ខែកញ្ញា។
ស្ថានភាពបែបនេះ នឹងធ្វើឱ្យបណ្តាខេត្តនៅតំបន់វាលទំនាបកណ្តាលមានសីតុណ្ហភាពអប្បបរមាពី២៣-២៥អង្សាសេ និងសីតុណ្ហភាពអតិបរមាមានពី៣៣-៣៥អង្សាសេ នឹងអាចមានភ្លៀងក្នុងកម្រិតពីខ្សោយទៅបង្គួរក្នុងនោះតំបន់ខ្លះក៏អាចមានភ្លៀងធ្លាក់ដោយអន្លើលាយឡំទៅដោយផ្គរ រន្ទះ និងខ្យល់កន្រ្តាក់។ ក្រសួងធនធានទឹកនិងឧតុនិយមបានឱ្យដឹងបន្តថា នៅតំបន់ខ្ពង់រាបសីតុណ្ហភាពអប្បបរមាមានពី២២-២៤អង្សាសេ និងសីតុណ្ហភាពអតិបរមាមានពី ៣២-៣៤អង្សាសេនឹងអាចមានភ្លៀងក្នុងកម្រិតពីតិចទៅច្រើនលាយឡំទៅដោយផ្គរ រន្ទះ និងខ្យល់កន្រ្តាក់។
ដោយឡែកនៅតំបន់មាត់សមុទ្រសីតុណ្ហភាពអប្បបរមាមានពី២២-២៤អង្សាសេ និងសីតុណ្ហភាពអតិបរមាមានពី ៣១-៣៣អង្សាសេ នឹងអាចមានភ្លៀងក្នុងកម្រិតពីតិចទៅច្រើនលាយឡំទៅដោយផ្គរ រន្ទះ និងខ្យល់កន្រ្តាក់។ ជាមួយគ្នានេះក្រសួងធនធានទឹក និងឧតុនិយមបានអំពាវនាវដល់ពលរដ្ឋដែលរស់នៅបណ្តាខេត្តក្នុងភូមិសាស្រ្តជាប់តំបន់ជួរភ្នំ ទីទំនាប និងជាប់ផ្លូវទឹក ត្រូវបង្កើនការប្រុងប្រយ័ត្នចំពោះជំនន់ទឹកភ្លៀងចាប់ពីថ្ងៃទី៦ ដល់ថ្ងៃទី៩ ខែកញ្ញា និងនៅលើផ្ទៃសមុទ្រមានភ្លៀងខ្យល់ និងរលកសមុទ្រខ្ពស់ចាប់ពីថ្ងៃទី៧ ដល់ថ្ងៃទី៩ ខែកញ្ញា៕
