ស្ថានឯកអគ្គរាជទូតកម្ពុជាប្រចាំនៅប្រទេសថៃ បានសហការរៀបចំដំណើរទស្សនកិច្ចសិក្សាលើកទី២ រយៈពេល៤ ថ្ងៃ ដោយចាប់ពីថ្ងៃទី០១ ដល់ថ្ងៃទី០៤ ខែកញ្ញា មកកាន់ខេត្តចំនួន២ របស់កម្ពុជា គឺខេត្តបន្ទាយមានជ័យ និងខេត្តសៀមរាប ដែលដំណើរទស្សនកិច្ចនេះមានការចូលរួមពីអង្គទូតនៃបណ្ដាប្រទេសជាមិត្ត ព្រមទាំងគ្រួសារតំណាងក្រសួង ស្ថាប័នពាក់ព័ន្ធព្រមទាំងវិស័យឯកជនសរុបប្រមាណ១០០ នាក់។

ប្រតិភូអង្គទូតបរទេស ដែលចូលក្នុងដំណើរទស្សនកិច្ចនេះរួមមាន អាហ្សង់ទីន អូទ្រីស បង់ក្លាដែស ប្រេស៊ីល កម្ពុជា  អេហ្សីប ហ្វាំងឡង់ ឥណ្ឌូណេស៊ី កូរ៉េខាងត្បូង និងម៉ាល់ឌីវ ជាដើម។ ដំណើរទស្សនកិច្ចនេះ ធ្វើឡើងក្នុងបំណងដើម្បីផ្សព្វផ្សាយពីស្ថិរភាពនយោបាយ សេដ្ឋកិច្ច ការអភិវឌ្ឍន៍ ច្បាប់វិនិយោគ និងកិច្ចព្រមព្រៀងពាណិជ្ជកម្មសេរីទ្វេភាគីពហុភាគីរវាងកម្ពុជានិងដៃគូ។

នៅខេត្តបន្ទាយមានជ័យ គណៈប្រតិភូ ទទួលបានការស្វាគន៏ពីអភិបាលខេត្តបន្ទាយមានជ័យ ឯកឧត្តម អ៊ុ រាត្រី ហើយគណៈប្រតិភូបានទៅទស្សនកិច្ចសិក្សានៅច្រកព្រំដែនអន្តរជាតិស្ទឹងបត់-ណងអៀនដែលនៅទីនោះ គឺជាស្ពានតភ្ជាប់ឆ្លងព្រំដែនរវាងប្រទេសទាំងពីរ ហើយច្រកនេះ នឹងក្លាយជាច្រកសម្រាប់ការដឹកជញ្ជូនទំនិញធុនធ្ងន់។ នាឳកាសនោះ ប្រតិភូអង្គទូតសន្យាថា នឹងនាំយកនូវអ្វីដែលពួកគាត់បានឃើញផ្ទាល់ទៅប្រាប់អ្នកវិនិយោគឲ្យមកបណ្តាក់ទុននៅកម្ពុជា។

ដោយឡែក នៅខេត្តសៀមរាប ប្រតិភូអង្គទូត បានជួបជាមួយលោកបណ្ឌិត ញឹម ខេមរា រដ្ឋលេខាធិការ និងជាប្រធានក្រុមការងារសម្របសម្រួលការទូតសេដ្ឋកិច្ចនៃក្រសួងការបរទេស និងសហប្រតិបត្តិការអន្តរជាតិកម្ពុជានៅក្នុងកម្មវិធីមួយដែលមានឈ្មោះថា "កម្មវិធីផ្តល់ព័ត៌មានស្តីពីយុទ្ធសាស្ត្រការទូតសេដ្ឋកិច្ច វិនិយោគ ពាណិជ្ជកម្ម និងទេសចរណ៍"។ លោកបណ្ឌិត ញឹម ខេមរា បានគូសបញ្ជាក់ថា ដំណើរទស្សនកិច្ចលើកទី២នេះ នឹងផ្តល់ឱកាសជូនអង្គទូតស្វែងយល់បន្ថែម ពីព្រះរាជាណាចក្រកម្ពុជា និងពង្រឹងបន្ថែមការតភ្ជាប់រវាងកម្ពុជា និងបណ្តាប្រទេសនានាក្នុងសកលលោក។

បន្ទាប់ពីជំនួបជាមួយលោកបណ្ឌិត ញឹម ខេមរា ប្រតិភូអង្គទូត បានទស្សនាប្រាសាទនានា នៅក្នុងរម្យណីយដ្ឋានអង្គរ៕ (មានជ័យ)