សៀមរាប៖ ពលរដ្ឋដែលស្នាក់នៅជុំវិញចម្ការរបស់លោក ខឹម វាសនា បានចាប់ផ្តើមចាកចេញជាបណ្ដើរៗតាំងពីយប់ថ្ងៃទី២៩រហូតដល់ព្រឹកថ្ងៃទី៣០ខែសីហានេះ បន្ទាប់ពីអាជ្ញាធរខេត្តសៀមរាបជូនដំណឹង និងត្រៀមកងកម្លាំងចាត់វិធានការតាមផ្លូវច្បាប់។
សេចក្តីរាយការណ៍បានឱ្យដឹងនៅព្រឹកនេះថា ពលរដ្ឋជាច្រើនបានបន្តចាកចេញជាហូរហែដើម្បីវិលត្រលប់ទៅផ្ទះរបស់ពួកគាត់រៀងៗខ្លួនខណៈអាជ្ញាធរមានសមត្ថកិច្ច បានត្រៀមកងកម្លាំងឃ្លាំមើលនិងចាត់វិធានការត្រឹមម៉ោង ២៤៖០០នាទីយប់ នាថ្ងៃទី៣០ ខែសីហា ឆ្នាំ២០២២នេះ។
សូមបញ្ចាក់ថា កាលពីថ្ងៃទី២៩ ខែសីហា ឆ្នាំ២០២២ រដ្ឋបាលខេត្តសៀមរាបបានចេញសេចក្តីជូនដំណឹងមួយដោយចាត់ទុកការឃោសនារបស់លោក ខឹម វាសនា ប្រធានគណបក្សសម្ព័ន្ធដើម្បីប្រជាធិបតេយ្យអំពីអភូតហេតុគ្រោះទឹកជំនន់លិចទូទាំងពិភពលោកថា ជាការឃោសនាប្រជាភិថុតិបែបអបីយជំនឿនិងប្រាសចាកពីការពិត និងបានធ្វើឱ្យប្រជាពលរដ្ឋមានការយល់ច្រឡំ និងមានភាពភិតភ័យដោយបោះបង់ចោលផ្ទះសម្បែង ការងារ និងមុខរបរ ហើយនាំគ្នាមកប្រមូលផ្ដុំស្នាក់នៅក្នុងដីចម្ការរបស់លោក ខឹម វាសនា ស្ថិតនៅក្បែរជើងភ្នំគូលែន ភូមិថ្មជល់ ឃុំ ត្បែង ស្រុកបន្ទាយស្រី ខេត្តសៀមរាប។
រដ្ឋបាលខេត្តសៀមរាបបានអំពាវនាវដល់ប្រជាពលរដ្ឋកុំជឿការឃោសនានិងការផ្សព្វផ្សាយតាមលក្ខណៈបែបប្រជាភិថុតិរបស់លោក ខឹម វាសនា និងបញ្ឈប់ការប្រមូលផ្តុំមកស្នាក់នៅ និងជួបជុំមនុស្សច្រើនជាការល្មើសនឹងវិធានការប្រយុទ្ធនិងទប់ស្កាត់ការឆ្លងរាលដាលនៃជំងឺកូវីដ-១៩ ដែលអាចប្រឈមនឹងការអនុវត្តវិធានការច្បាប់ជាធរមាន៕
