ភ្នំពេញ៖ លោកទេសរដ្ឋមន្រ្តី គន់ គីម អនុប្រធានទី១នៃគណៈកម្មាធិការជាតិគ្រប់គ្រងគ្រោះមហន្តរាយបានចាត់ទុកការលើកឡើងរបស់បុគ្គលមួយចំនួនអំពីការជន់លិចគ្រប់ទីកន្លែងថា ជារឿងអកុសលនិងខុសឆ្គង។

នៅក្នុងដំណើរចុះពិនិត្យស្ថានភាពជំនន់ទឹកភ្លៀងក្នុងខេត្តព្រះវិហារ នាចុងសប្តាហ៍កន្លងទៅនេះលោកទេសរដ្ឋមន្រ្តី គន់ គីម បានមានប្រសាសន៍ថា មកទល់ពេលនេះមិនមានការជន់លិចធ្ងន់ធ្ងរណាមួយដូចការលើកឡើងរបស់បុគ្គលខ្លះនោះឡើយហើយលោកចាត់ទុកការជឿខុសការពិតគឺជារឿងអកុសលនិងខុសឆ្គង។

អនុប្រធានទី១ នៃគណៈកម្មាធិការជាតិគ្រប់គ្រងគ្រោះមហន្តរាយបានលើកឡើងថា តាមរយៈការចុះត្រួតពិនិត្យតាមបណ្តាខេត្តមួយចំនួនដូចជាខេត្តបាត់ដំបង បន្ទាយមានជ័យ សៀមរាប និងតាមបណ្តាខេត្តមួយចំនួនទៀតគឺមិនទាន់មានខេត្តណាមួយមានហានិភ័យដែលអាចឈានដល់ការព្រួយបារម្ភនៅឡើយទេខណៈអាជ្ញាធរបានយកចិត្តទុកដាក់បានល្អប្រសើរ។

យ៉ាងណាក៏ដោយលោកទេសរដ្ឋមន្រ្តី គន់ គីម អនុប្រធានទី១នៃគណៈកម្មាធិការជាតិគ្រប់គ្រងគ្រោះមហន្តរាយបានអំពាវនាវដល់ប្រជាពលរដ្ឋដែលរស់ក្បែរដងស្ទឹងសែន ត្រូវមានការប្រុងប្រយ័ត្ន និងរងចាំតាមដានការប្រកាសព័ត៌មានរបស់អាជ្ញាធរមានសមត្ថកិច្ច ដែលបញ្ជាក់ពីស្ថានភាពទឹកច្បាស់លាស់៕

Caption