ភ្នំពេញ៖ ធនាគារជាតិនៃកម្ពុជាបានព្រមានចាត់វិធានការតាមផ្លូវច្បាប់ចំពោះក្រុមហ៊ុន ឬបុគ្គលដែលធ្វើសកម្មភាពផ្សព្វផ្សាយយ៉ាងបើកចំហនិងផ្តល់ឥណទានដល់ប្រជាពលរដ្ឋដោយខុសច្បាប់ និងអំពាវនាវឱ្យប្រុងប្រយ័ត្នពីការបោកប្រាស់។
យោងតាមការប្រកាសព័ត៌មានរបស់ធនាគារជាតិនៃកម្ពុជាបានឱ្យដឹងថា កន្លងមកមានជនខិលខូចមួយចំនួនបានផ្សព្វផ្សាយយ៉ាងបើកចំហនិងផ្តល់ឥណទានដល់ប្រជាពលរដ្ឋតាមរូបភាពផ្សេងៗជាច្រើនដូចជា ប្រព័ន្ធអនឡាញ បណ្តាញសង្គម ការផ្សព្វផ្សាយតាមខិត្តប័ណ្ណនិងការបិតផ្សាយតាមទីកន្លែងសាធារណៈនានាជាដើម។ ធនាគារជាតិនៃកម្ពុជាបានចាត់ទុកការផ្តល់ឥណទានដោយក្រុមហ៊ុន ឬបុគ្គលដែលគ្មានអាជ្ញាបណ្ណគឺជាសកម្មភាពល្មើសនឹងច្បាប់ជាធរមានជាពិសេសច្បាប់ស្តីពី គ្រឹះស្ថានធនាគារនិងហិរញ្ញវត្ថុ។
ធនាគារជាតិនៃកម្ពុជាបានលើកឡើងថា បានស្នើដល់សាធារណជនទាំងអស់ឱ្យប្រុងប្រយ័ត្ននិងលើកទឹកចិត្តឱ្យប្រើប្រាស់តែសេវារបស់គ្រឹះស្ថានផ្លូវការតែប៉ុណ្ណោះ។ ជាមួយគ្នានេះធនាគារជាតិនៃកម្ពុជាបានថ្កោលទោសចំពោះការផ្សព្វផ្សាយព័ត៌មាន និងការផ្តល់ឥណទានក្រៅផ្លូវការខុសច្បាប់គ្រប់រូបភាពនិងកំពុងសហការជាមួយអាជ្ញាធរមានសមត្ថកិច្ចពាក់ព័ន្ធដើម្បីចាត់វិធានការតាមផ្លូវច្បាប់។
ធនាគារជាតិនៃកម្ពុជាបានបញ្ជាក់ដែរថា បច្ចុប្បន្នមានគ្រឹះស្ថានធនាគារនិងហិរញ្ញវត្ថុដែល ទទួលបានអាជ្ញាបណ្ណប្រកបអាជីវកម្មពីធនាគារជាតិនៃកម្ពុជារួមមាន៖ ធនាគារពាណិជ្ជ ធនាគារឯកទេស គ្រឹះស្ថានមីក្រូហិរញ្ញវត្ថុទទួលប្រាក់បញ្ញើ គ្រឹះស្ថានមីក្រូហិរញ្ញវត្ថុ ក្រុមហ៊ុន ភតិសន្យាហិរញ្ញវត្ថុ គ្រឹះស្ថាន ឥណទានជនបទ គឺជាប្រភេទគ្រឹះស្ថានស្របច្បាប់និងផ្លូវការដែលអាចផ្តល់ឥណទាននិង ឬសេវាពាក់ព័ន្ធផ្សេងទៀតដល់ក្រុមហ៊ុន សហគ្រាស និងឯកត្តជន៕
