ភ្នំពេញ៖ លោក ហេង សួរ រដ្ឋលេខាធិការនិងជាអ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈបានអំពាវនាវដល់ពលករដែលកំពុងស្នាក់នៅនិងធ្វើការនៅប្រទេសកូរ៉េកុំលង់នឹងការឃោសនាបែបអបិយជំនឿរបស់បុគ្គលមួយរូបពីគ្រោះមហន្តរាយទឹកជំនន់លិចលង់គ្រប់ប្រទេស។
ប្រតិកម្មនេះបានកើតឡើងក្រោយពេលមានពលករខ្មែរមួយចំនួននៅក្រៅប្រទេសចង់ឈប់ពីការងារ ហើយត្រលប់មកកម្ពុជាវិញតាមការឃោសនារបស់បុគ្គលជាប្រធានគណបក្សនយោបាយមួយ។
លោក ហេង សួរ អ្នកនាំពាក្យក្រសួងការងារនិងបណ្តុះបណ្តាលវិជ្ជាជីវៈបានលើកឡើងថា ការបោះបង់ចោលការងារហើយវិលត្រឡប់មកកម្ពុជាវិញទាំងតក់ត្រហល់គឺប៉ះពាល់ដល់កេរ្តិ៍ឈ្មោះពលករខ្មែរ ដែលតែងតែទទួលបានការគោរពស្រឡាញ់និងចូលចិត្តពីនិយោជកកូរ៉េ ហើយជាការបោះបង់ចោលប្រភពចំណូលដ៏ធំសម្រាប់ទ្រទ្រង់ឪពុកម្តាយនិងបងប្អូនរបស់ខ្លួនខណៈការធ្វើបែបនេះគឺមិនអាចវិលត្រឡប់ទៅប្រទេសកូរ៉េវិញបានឡើយ។
លោកបានលើកឡើងទៀតថា ប្រសិនជាពិភពលោកនេះនឹងជួបប្រទះគ្រោះមហន្តរាយកើតទៅជាទឹកជំនន់លិចលង់គ្រប់ប្រទេសដូចបុគ្គលម្នាក់និយាយមែននោះអ្នកវិទ្យាសាស្ត្រប្រកាសអាសន្នទូទាំងពិភពលោក។ តាមទិន្នន័យព្យាករណ៍អាកាសធាតុដោយបណ្តាញព័ត៌មានកូរ៉េ និងបណ្តាញព័ត៌មានអន្តរជាតិធំៗក៏ដូចជាស្ថាប័នតាមដានការប្រែប្រួលបរិដ្ឋានអន្តរជាតិគឺមិនមានទិន្នន័យណាមួយបង្ហាញសញ្ញាថានឹងមានគ្រោះធម្មជាតិនៅក្នុងខែសីហានេះ និងខែកញ្ញានោះឡើយ ហើយត្រូវតាំងស្មារតី យកវិទ្យាសាស្ត្រជាគោលហើយយកអនាគតរបស់ខ្លួន គ្រួសារខ្លួន និងសង្គមជាតិខ្លួនជាធំ៕
