ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រីកម្ពុជាបានចាត់ទុកការបង្កើតវិទ្យាស្ថានភាសាបរទេសនឹងផ្តល់ផលចំណេញខណៈការចេះភាសាបរទេស នឹងជួយសម្រួលដល់ការបំពេញការងារផ្សេងៗ។
ការថ្លែងរបស់សម្តេចតេជោ ហ៊ុន សែន បន្ទាប់ពីមានការរិះគន់អំពីការបង្កើតដេប៉ាតឺម៉ង់សិក្សាភាសាវៀតណាមនៅសាកលវិទ្យាល័យភូមិន្ទភ្នំពេញ។ នៅក្នុងពិធីប្រគល់សញ្ញាបត្រជូននិស្សិតជ័យលាភីរបស់សាកលវិទ្យាល័យអាស៊ី-អឺរ៉ុប នាព្រឹកថ្ងៃទី២៣ ខែសីហា ឆ្នាំ២០២២នេះ សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានមានប្រសាសន៍ថា អ្នកចេះភាសាអ្វីក៏ដោយគឺមិនខាតទេតែនឹងផ្តល់ផលល្អសម្រាប់ការបំពេញការងារផ្សេងៗ។
សម្តេចតេជោ ហ៊ុន សែន បានបញ្ជាក់ថា ការបើកបង្រៀនភាសាវៀតណាមនេះមិនមែនយកនិស្សិតវៀតណាមមករៀននៅកម្ពុជានោះទេផ្ទុយទៅវិញការបើកបង្រៀនភាសាវៀតណាម ដើម្បីជួយសម្រួលសម្រាប់និស្សិតទៅសិក្សានៅវៀតណាមនិងដល់សម្រួលការធ្វើធុរកិច្ចផងដែរ។
កាលពីថ្ងៃទី១៩ ខែសីហា ឆ្នាំ២០២២ លោកបណ្ឌិត ហង់ជួន ណារ៉ុន រដ្ឋមន្ត្រីក្រសួងអប់រំយុវជន និងកីឡា បានស្នើដល់សាធារណជនកុំមានការយល់ច្រឡំអំពីថ្នាក់បង្រៀនភាសាវៀតណាម។
លោកបញ្ជាក់ថា ថ្នាក់បង្រៀននេះពុំបានដាក់បញ្ចូលឱ្យបង្រៀនគ្រប់ជំនាញនៅក្នុងសាកលវិទ្យាល័យភូមិន្ទភ្នំពេញឡើយហើយគ្រាន់តែជាថ្នាក់រៀនមួយដាច់ដោយឡែកប៉ុណ្ណោះនិងគ្មានការបង្ខិតបង្ខំណាមួយនោះដែរ។
មន្រ្តីក្រសួងអប់រំយុវជន និងកីឡា ធ្លាប់បានឱ្យដឹងថា បច្ចុប្បន្នសាកលវិទ្យាល័យភូមិន្ទភ្នំពេញមានកម្មវិធីបរិញ្ញាបត្រភាសាបរទេសដូចជា ភាសាអង់គ្លេស បារាំង ចិន ជប៉ុន កូរ៉េ និងថៃ ជាដើម៕
