បាត់ដំបង៖ ជនញៀនគ្រឿងញៀននិងជនវិបល្លាស ដែលដើរដេកតាមសួនច្បារក្នុងក្រុងបាត់ដំបង ខេត្តបាត់ដំបង ត្រូវបានអាជ្ញាធរចុះប្រមូលជាលើកទី៣ដើម្បីយកទៅកសាងជីវិតថ្មីនិងរៀបចំកែលម្អសោភ័ណភាពទីក្រុងឡើងវិញ។
លោក សុខ លូ អភិបាលខេត្តបាត់ដំបងបានឱ្យដឹងថា ការរៀបចំសណ្ដាប់ធ្នាប់នេះគឺដើម្បីសុខសុវត្ថិភាពរបស់ប្រជាពលរដ្ឋក្នុងក្រុងបាត់ដំបងក៏ដូចជាផ្ដល់ឱកាសឱ្យជនញៀនគ្រឿងញៀន និងជនវិបល្លាសបានកសាងជីវិតថ្មី។
លោកបានឱ្យដឹងដែរថា ក្រុមការងារខេត្តបានធ្វើយុទ្ធនាការនេះចំនួន៣លើករួចមកហើយដោយប្រមូលជនញៀនគឿងញៀន និងជនវិបល្លាសទៅមជ្ឈមណ្ឌលពិភពនៃក្ដីសង្ឃឹមបវេល និងទៅមជ្ឈមណ្ឌលស្ដារនីតិសម្បទា ខេត្តកណ្ដាល។
សូមបញ្ជាក់ថា ក្នុងយុទ្ធនាការកន្លងទៅនេះ អាជ្ញាធរប្រមូលបានជនញៀនគឿងញៀន និងជនវិបល្លាសក៏ដូចជាជនអនាថារាប់រយនាក់យកទៅព្យាបាលនិងកសាងជីវិតថ្មី នៅតាមមជ្ឈមណ្ឌលស្ដារនីតិសម្បទា។
ការធ្វើសកម្មភាពកន្លងទៅ ទទួលបានការសាទរពីប្រជាពលរដ្ឋខណៈអាជ្ញាធរខេត្តបាត់ដំបងបានរំពឹងថា សោភ័ណភាពក្រុងបាត់ដំបងនឹងមានរបៀបរៀបរយល្អឡើងវិញ ហើយនឹងមានអ្នកទេសចរជាតិនិងអន្តរជាតិមកទស្សនាច្រើនផងដែរ៕
