ភ្នំពេញ៖ រដ្ឋមន្ត្រីក្រសួងអប់រំ យុវជន និងកីឡា នឹងធ្វើសន្និសីទសារព័ត៌មានស្តីពីការបង្កើតវិទ្យាស្ថានសិក្សាអន្តរជាតិ និងគោលនយោបាយសាធារណៈនៅរសៀលថ្ងៃទី១៩ ខែសីហា ឆ្នាំ២០២២។
ការប្រកាសធ្វើសន្និសីទសារព័ត៌មាននេះបានកើតឡើងក្រោយពេលមានការលើកឡើងពីការយល់ស្រប និងមិនយល់ស្របជុំវិញការអនុញ្ញាតឱ្យមានដេប៉ាតឺម៉ង់ សិក្សាវៀតណាមនៅក្នុងសាកលវិទ្យាល័យភូមិន្ទភ្នំពេញ។
តាមសេចក្តីប្រកាសព័ត៌មានរបស់ក្រសួងអប់រំ យុវជន និងកីឡា បានឱ្យដឹងថាសន្និសីទសារព័ត៌មាននឹងធ្វើឡើងនៅវេលាម៉ោង១៦.៣០នាទី នាទីស្តីការក្រសួងអប់រំ យុវជន និងកីឡា ហើយមានការចូលរួមពីលោកបណ្ឌិតសភាចារ្យ ហង់ជួន ណារ៉ុន ផងដែរ។
សូមរំលឹកថា នាពេលថ្មីៗមកៗមន្រ្តីនៃរដ្ឋាភិបាលវៀតណាមបានស្នើរឱ្យមានការកម្មវិធីសិក្សាភាសាវៀតណាមនៅក្នុងសាកលវិទ្យាល័យភូមិន្ទភ្នំពេញ។ ការណ៍នេះបង្កឱ្យមានមតិលើកឡើងទាំងយល់ស្រប និងមិនយល់ស្របខណៈមន្រ្តីក្រសួងអប់រំ យុវជន និងកីឡា អះអាងថា កម្មវិធីសិក្សាភាសាវៀតណាមដែលគ្រោងនឹងបញ្ចូលនៅផ្នែកសិក្សាមួយនៃសាកលវិទ្យាល័យភូមិន្ទភ្នំពេញគឺជាកិច្ចសហប្រតិបត្តិការរវាងប្រទេសជាមិត្តលើវិស័យអប់រំខណៈបច្ចុប្បន្ន សាកលវិទ្យាល័យភូមិន្ទភ្នំពេញមានកម្មវិធីបរិញ្ញាបត្រភាសាបរទេសដូចជា ភាសាអង់គ្លេស បារាំង ចិន ជប៉ុន កូរ៉េ និងថៃ ជាដើម៕
